TOP

Musaayimuto Nalwanga bw'ayimba ku muka kitaawe tolemwa kukwata ku ttama

Added 20th January 2017

Nalwanga asoma mu ssomero lya Sunrise e Mpererwe nga muwala wa Ronald Lule ne Sarah Baluka abatuuze b’e Nansana Kyebando oluyimba alutuumye “Step mother” mw’alombojjera ennaku muka kitaawe gy’amuyisaamu awaka.

  Omuyimbi omuto Nalwanga

Omuyimbi omuto Nalwanga

BYA RONALD MUGENYI

ANITAH Shanah Nalwanga, 9, ayimbye ng’alombojja engeri abakazi ababeera mu maka gye bakijjanyamu abaana ba baggya baabwe.

Nalwanga asoma mu ssomero lya Sunrise e Mpererwe nga muwala wa Ronald Lule ne Sarah Baluka abatuuze b’e Nansana Kyebando oluyimba alutuumye “Step mother” mw’alombojjera ennaku muka kitaawe gy’amuyisaamu awaka.

Agamba nti by’ayimbako byamubuulirwa munne bwe basoma n’amulaga okubonaabona kw’ayitamu ne muka kitaawe.

“Nnina mukwano gwange gwe nsoma naye eyaηηambanga nti tebaamuwanga byakulya ne ssente z’okuwuga n’ez’okulambula.

Awaka baamukozesanga emirimu mingi emizibu omuli okwoza engoye za muka kitaawe ne baganda be ate bwe zitaatukulanga ng’alina okuziddamu nga bamuwereekerezaako empi n’ebivumo.

Ebiseera ebisinga abeera munakuwavu ku ssomero ng’oluusi amanyi n’okukaaba yekka nga tewali amukubye. Nagezangako okumubuuza ky’abadde ng’agamba nti abeera yeeraliikirira muka kitaawe.

Lumu yajja ku ssomero nga twakava mu luwummula n’ekifaananyi kya maama we omutuufu ne mmubuuza nnannyini kifaananyi.

Yaηηamba nti yabadde agenze ewa jjajjaawe mu luwummula, n’akimuwa n’amugamba nti oyo ye yali maama wo omutuufu naye yafa ng’akuzaala.

Bambi bino byonna yabyogera bw’akaaba,’’ Nalwanga bwe yagambye. Nalwanga y’omu ku baayimba mu kivvulu kya Toto ekyali e Lugogo omwaka oguwedde ekyategekebwa Vision Group nga kumpi buli muntu omukulu eyaliwo yasigala yeesooza ku ky’abakazi ababonyaabonya abaana b’abaggya baabwe.

Nalwanga agamba nti bwe yabitegeeza bazadde be ng’ayagala bayambe ku mukwano gwe okukwata omukazi amukijjanya bamutwale ku poliisi kwe kumutegeeza nti omwana abeera ne ‘Step Mother’ ne bawunzika nga bagamba nti bafukamire bamusabire Katonda ajja kumuyamba.

Agamba nti wano we waava ekirowoozo ky’okuwandiika oluyimba nga kitaawe bw’amuyamba era baalutuuma Step Mother. Nalwanga agamba nti ayagala kusoma mateeka ng’akuze afuuke omulamuzi ate asigale ng’ayimba.

Nalwanga (wakati) ng’atudde ne gwe yakozesa ng’omuzimu gwa nnyina (ku kkono) ne Martha gw’ayimbako nga muka kitaawe amukijjanya.

 

Kitaawe, Ronald Lule agamba nti naye yeewuunya muwala we okuyimba n’okubeera n’ebirowoozo by’ekintu ekikulu okuva nga wa myaka etaano.

Agamba nti awandiise ne yeeyimbira ennyimba endala okuli Happy era bamuyambako okutumbula ekitone kye ate nga bafuba okumwagazisa okusoma ku ssomero.

Ebimu ku bitundu mu luyimba lwa Nalwanga

Munnange ndi mu buzibu
Kuba maama anzaala yanfaako
Bino bye mbonaabona ssandibirabye
ssinga maama waali
Yii step mother wange nedda, naawe
oli muzadde
Kendeezaako ku ngeri gy’ompisaamu
Emirimu gy’onkozesa si gya siyizi yange
Ggomesi z’onjozesa ate bwe zitatukula
n’onkuba
Okwo ssaako okunfumbisa emmere
n’okunkimisa amazzi
Nga buli lwe mba ngezaako okukugamba
nti nnina ‘homework’
Ggwe maama n’okuba.
 
EKITUNDU 2
 
Step mother kimanye maama gy’ali
by’okola byonna abiraba
Era tajja kuwummula mirembe nga
ntulugunyizibwa bwenti
Yii maama oluusi ndaba omuzimu
gwo
Nga ndi mu bulumi naye bwe ngezaako
okwogera naawe nga tonziramu
Maama vvaayo onziruukirire naye nfa
Muka ssebo antulugunya ekisukkiridde,
mpulira nneekyaye
Nze ηηenda okukula mu baana
bonna nga ssirabye ku mukwano gwa
maama
Wabula okutulugunyizibwanga ekiro
n’emisana
Nga n’okusoma muka kitange akunnyiyizza.

More From The Author

Emboozi z’omuwandiisi endala

Emboozi endala

Kigonvu (ku ddyo) ng'annyonnyola omuserikale ebikwata ku ttaka lino.

Omusika atabuse ne nnyina l...

WAABADDEWO akasattiro ku kyalo Kabuuza e Matugga mu Ggombolola y’e Gombe mu disitulikiti y’e Wakiso, abaana b’omugenzi...

Abamu ku batembeeyi nga batadde emmaali yaabwe wabweru w’amaduuka agaliraanye ekibangirizi ky’omu Kikuubo mu Kampala.

Abasuubuzi boogedde bwe bak...

ABASUUBUZI b’omu Kampala abeegattira mu bibiina ebyenjawulo beekokkola embeera ey’ebyobufuzi eriwo naddala ebyokulonda...

Hudu Hussein eyalondeddwa okubeera omubaka wa pulezidenti mu Kampala.

Nsookera ku kugatta Bannaka...

HUDU Hussein eyalondeddwa ku bwa RCC wa Kampala agambye nti ky’atandikirako kwe kugatta Bannakampala bave mu njawukana...

Looya Fred Muwema ng’aliko by’annyonnyola Ham (wakati) bwe baabadde ku kkooti ejulirwamu eggulo.

Kkooti egobye okusaba kwa B...

KKOOTI ejulirwamu egobye okusaba kwa Bbanka enkulu (BOU) mw’ebadde eyagala okugattibwa ng’abatalina ludda mu musango...

Minisita Ssempijja e Lukaya ng’ayogera eri abawagizi be.

Minisita Ssempijja akyayomba

MINISITA Vincent Bamulangaki Ssempijja eby'okumukuba akalulu byongedde okumutabula. Okuva lwe yawangulwa, anenyezza...