Munnamawulire eyakwatibwa ku by'okuyeekera gavumenti yeegayiridde omulamuzi amusonyiwe

Munnamawulire n'abalala abaakwatibwa ku by'okuyeekera gavumenti baagala baweebwe ekisonyiwo.

Kenneth Odida, munnamawulire wa UBC yasabye ekisonyiwo n’abalala okuli Sulaiman Ogona. ,Omara Joseph, Saidi Francis , Ocieng Ambrose, Okot Innocent ,Oyom Solomon ,Oduru Said,ne Ronald George Mulindwa.

Bano nga bayita mu bannamateeka baabwe Capt. Simon Nsubuga ne PTE Priscilla Kakande baagala gavumenti ebasonyiwe ku misango egibavunaanibwa.

Omuwaabi wa gavumenti, Lt Alex Mukwana yagambye nti ofiisi yaabwe tennafuna kusaba kwabwe olw’emitendera egigobererwa.

Mukwana yagambye nti ensonga z’okusaba ekisonyiwo zitwala ebbanga eriwerako era bo ffayiro ezikwata ku baagala ekisonyiwo baazifuna kuva mu kakiiko ka Amnesty Commission kyokka eya bano yakakasizza nti tebannagifunako.

Kyokka yayongeddeko nti bano balindemu kubanga okunoonyereza kukyagenda mu maaso era oludda oluwaabi lwandibaawo abantu abalala be lwagala okukwata okugatta ku bano.

Abawawaabirwa bonna kuliko Pte Yofas Adia , Joseph Omara ng'oluusi yeeyita Musumba nga dokita mu kkampuni ya Aloesha Organic , Ronald George Mulindwa , Rashid Nabugodi ,, Peter Opi ,Ambrose Kibuuka Ocean ,Francis Said , Innocent Okot, Joseph Onom , Suleiman Obwana , Mike Mutua , Jamada Otim, ne Hamster Otim nga bavunaanibwa emisango esatu okuli obuyeekera n'okusekeeterera gavumenti ssaako okusangibwa n'ebyokulwanyisa bya bamukwatammundu mu bukyamu.

Bano era bavunaanibwa okubeera n'amasasi 358 ag'emmundu ekika kya SMG agakola obulungi nga byonna bya bamukwatammundu era babirina mu bukyamu.

Abawawaabirwa kigambibwa nti baasangibwa n'emmundu bbiri okuli SMG nnamba UG POL- 56591061172 ne SMG nnamba UG POL- 56581007363761 nga zigambibwa nti za bamukwatammundu aba UPDF.

Kigambibwa nti bano era baalina emmundu endala kisasikimu (pump action gun) n’amasasi 358 ssaako ebyokulwanyisa nnamuzisa ebimanyiddwa nga Improvised Explosive Devices (IED) byonna baali babirina mu bukyamu.

Ebikolwa bino kigambibwa nti baabyenyigiramu wakati wa October 2022 ne February 2023 mu bitundu bya Kampala , Arua ne Mbale nga beenyigira mu buyeekera n'ekigendererwa ky’okuggyako gavumenti eno.

Oludda oluwaabi lugamba nti bano baawandiisa abantu era ne babayingiza mu buyeekera nga baagala okutaataaganya ebyokwerinda by'eggwanga Uganda. Bazziddwa mu kkomera okutuusa nga January 9, 2024.