Eby’okwerinda byongiirwemu amaani aha mugyera gwa Kafu- Hoima.

N’ebya Wilson Asiimwe 

HOIMA

Pooriisi eyongiire amaani omu by’okwerinda aharuguuto orwa Hoima-Kampala bwanyima y’amagara g’abantu kuza omu kabi barikuteeraho kuraba omu maizi bwanyima y’orutindo orwa Kafu kwijura amaizi gukabooga.

Omu mwabazyo gw’orwakabiri, Pooriisi kuruga omu bicweka bitari bimwe bya disiturikiti eya Hoima na Kyankwanzi eteirwe aha mugyera ogu kubaasa kutangira abantu obutaraba omu maizi aga ahabw’okuba amaizi nigaguma nigeyongyera.

Oruguuto orwa Hoima-Kampala rukingirweho ahabwa kanyabwanya bwanyima y’omugyera ogwa Kafu kubooga ahabwe’njura y’amaani egwire omu kicweka eki ekireteire amaizi kwijura omu mugyera gakarenga.

Omugyera gwa Kafu oguboogire amaizi gakasharaho oruguuto ekireteire oruguuto orwa Hoima- Kampala rwakingwa ahabwa kanyabwanya.

Omugyera ogwa Kafu ogurikunywanisa za disiturikiti eya Hoima na Kyankwanzi guboogire omu mwabazyo gw’orw’okubanza shaaha nka 12 z’omwabazyo ekiteganiise eby’entambura omu kicweka eki.

Omu gomborora eya Buhanika, Pooriisi esibire nerwanagana n’abantu ababaire batandika kureeta obutimba kutandika kujuba eby’enyanja.

“Orutindo orwa Kafu rujabami omu maizi obwa hati, ekirikumanyisa ngu tihaine omuntu orikubaasa kurabaho. Titurikwenda kuta amagara g’abantu omu kabi kandi titurikwija kwikiriza omuntu weena kurabaho, okwihaho abanyamakuru abarikuteera ebishushani by’amakuru hamwe n’abakozi b’ekitongore ky’enguuto ekya UNRA abarikushwijuma embeera eri aha mwanya ogu, Alfred Masereka- Omu Pooriisi aha mugyera arikushoborora.

Julius Hakiza, Omugambirizi wa Pooriisi ahabw’ekyanga ekya Albertine naagira ngu oruguuto oru rukikingire ahabw’okuba amaizi gakiri mingi.

Fred Bagonza, omutuura w’omu kyaro ekya Katereiga omu gomborora eya Buhanika naagira ngu omwijuzo gw’amaizi ogu guteganiise abeegi abarikushomera omuri za disiturikiti 2 eya Hoima na Kyankwanzi.

#WestUpdates