Omwegi wa S.6 wa Kitagata SS agwire omu kamina y’eishomero yaafa.

N’ebya Bruno Mugizi

SHEEMA

Omwegi wa S.6 ah’eishomero erya Kitagata Secondary School omu disiturikiti eya Sheema ashangirwe afiire bwanyima y’okugwa omu kamina y’eishomero.

Omugyenzi amanyirwe nka; Capson Rwamamanzi, 23, omutuura w’omu kyaro ekya Nyabutama omu muruka gwa Butare omu disiturikiti eya Ntungamo.

Omugambirizi wa Pooriisi ahabwa Bushenyi empango, Martial Tumusiime naagira ngu eki kibaireho aha Sande ebiro 12/11/22023 shaaha nka 9 z’eihangwe obu Rwamamanzi (omugyenzi) abaire agiire kweshemeza.

Omugambirizi wa Pooriisi ahabwa Bushenyi empango, Martial Tumusiime naagira ngu eki kibaireho aha Sande ebiro 12/11/22023 shaaha nka 9 z’eihangwe obu Rwamamanzi (omugyenzi) abaire agiire kweshemeza.

Muhanuzi Aguma, omwegi ah’eishomero eri nawe obaire agiire omu kamina naagira ngu ahuriire Rwamamanzi arikuteeza kodi aha rwigi beitu ashangire haine abaire arimu nikwo kuza omu kamina endiijo.

“Bwanyima y’akaire kakye, mpurire eiraka ry’ekintu ririkutinisa ekingyemesereize kugyenda kureeba ekyabaho kandi kungire kushanga nashanga kamina ebaire ebomokire ahansi. Nteekateekire ngu Rwamamanzi abaasa kuba yagwamu nikwo kumanyisaho bakuru b’eishomero eri abatandikire kurondereza ahi Rwamamanzi yakubaasa kuba ari,” Muhanuzi arikushoboorora.

Mukuru w’eishomero eri, Elly Biryomumaisho, agambeire abanyamakuru ngu ku bashwijumire abeegi ababaire bari ah’eishomero omukaire ako (Roll Call) baahamya ngu Rwamamanzi abaire atari omu eishomero nikwo kuteekateeka ngu abaasa kuba yagyenda n’abeegi ba S.4 ababaire baaheerize kukora ebigyezo byabo.

“Tugarukire twakora okushwijuma okundi omu mwabazyo gwa Sande shaaha nk’emwe y’omwabazyo kandi Rwamamanzi abaire atariho ekitugyemesereize kumanyisaho Pooriisi ya Kitagata ahanshonga egi aharw’okubanza ebiro 13/11/2023 shaaha nka 7:45 z’eihangwe,” Biryomumaisho arikwongyera kushoboorora.

Ekimotoka kya 'grader' kirikutimba kwihayo omutumbi gw'omwegi wa S.6 Capson Rwamamanzi ogwire omu kamina y'eishomero erya Kitagata Secondary School, Sheema disiturikiti.

Innocent Baramura, ishe w’omugyenzi naagira ngu eishomero tiritwire bujunaanizibwa bw’okureeberera omwana we bwanyima y’okutunga okumanyisibwa kuruga omu beebembezi b’eishomero eri omu eihangwe ry’Orwokubanza aha kubura kw’omwana we.

“Eishomero rishemereire kujunaanwa aha kufa kw’omwana wangye ahabw’okuba ritwire ritarikufayo aha kumureebuuza. Omuzaire yaaheza kutwara omwana we ah’eishomero, n’obujunaanizibwa bwa mukuru w’eishomero n’abashomesa kureeba ngu omwana ogwo ari gye,” Baramura arikworeka obutamarwa.

Sam Orikunda, Omuhwezi wa RDC wa Sheema naajumiirira abarambuzi b’amashomero ahabw’okuremwa kukora omurimo gwabo ogw’okurambura amashomero.

“Ninshaba abarambuzi b’amashomero okukora gye omurimo gwabo, bashemereire kurambura ebyombeko byona bakareeba yaaba bihikaine n’omutindo gw’abeegi kubizamu. Haba haine ekirikuburamu, bashemereire kumanyisa ab’obushoboorozi bakakora aha nshonga egi aho n'aho,” Orikunda arikushoboorora.

Omugambirizi wa Pooriisi, Martial Tumusiime naagira ngu kubagiire kucondooza baashanga Rwamamanzi agwire omu kamina yaafa kandi bareeta emotoka ya grader eyatimba kamina ekamwihayo. 

Rwamamanzi yaziikwa eriizooba omu kyaro kya Nyabutama omu muruka gwa Butare omu disiturikiti eya Ntungamo.

#WestUpdates