Orikuteekateekwaho kuba omushuma w’emotoka ashazirweho okuguru.

N’ebya Hudson Apunyo

LIRA

Abashaho ah’eirwariro erihango erya Lira bashazireho okuguru kw'omushaija oteekateekirweho kuba omushuma w’emotoka omuri bukizi bwa bumosho bwa Uganda.

Okuguru kwa Paul Omara kusiisikariire omu kikorwa ahi Pooriisi eteire amasasi emotoka ei abaire naavuga wiiki ehwaire.

Okucondooza kwa Pooriisi nikworeka ngu Omara, enzaarwa ya Kenya ayangire kukuratira okuragiira kwa Pooriisi nikwo kwanga kwemerera.

Orwakana orwa wiiki ehwaire, Pooriisi omuri Lira eteire amasasi maingi kubaasa kwemereza omuvugi w’emotoka erikuteekateekwa kuba ebaire eyibirwe kuruga Kenya.

Okurugiirira aha mugambirizi wa Pooriisi ahabw’ekyanga ekya North Kyoga, Jimmy Patrick Okema, omuvugi w’emotoka egi ayangire kukuratira okuragiira kwa Pooriisi kumubuuza ebikwatireine n’emotoka egi ei abaire naavuga.

Okema naagira ngu Pooriisi egyemesereziibwe kuteera amasasi emipiira y’emotoka kandi hoona abantu 3 ababaire bagirimu hamwe n’omu Pooriisi omwe bahutaariire omu kikorwa eki.

Abahutaire bamanyirwe nka; George Otyato, orikuruga Awendo omuri Kenya, Husein Akako kuruga Tororo-Malaba hamwe na Omara orikuruga Oyugis, omu eishaza erya Homabay omuri Kenya.

Abacondooza ba Pooriisi nibooreka ngu bataahi baabo aha Pooriisi ya Karuri omu rurembo orwa Nairobi babaire baahababire omushango gw’obushuma bw’emotoka ehandiikirwe omu namba eya KDH 790K Toyota Land Cruiser erikwiragura.

Aba Pooriisi omuri Nairobi bagizire ngu abashuma abaibire emotoka egi babaasa kuba bagivugire bakagitwara omu Uganda.

Omu Pooriisi oteirwe eisasi omu kifuba atagyenderiirwe amanyirwe nka Tonny Ebong.

Pooriisi neegira ngu ku bahikire omu Uganda, enamba y'emotoka bagihindwire bagiha UBE 665K kubuzaabuza ab'eby'okwerinda.

Emotoka erikuteekateekwa kuba ey'enyibano eri aha Pooriisi ya Lira.

Okema naagira ngu omwe omuri ba nyakuteekateekwaho omanyirwe nka Paul Omara okuguru kwe kushazirweho kandi abandi babiri abarikuteekatekwaho bariyo nibaba gye ah'eirwariro erihango erya Lira 

Emotoka erikuteekateekwa kuba ey'enyibano eri aha Pooriisi ya Lira.

#WestUpdates