Museveni yaragiira ngu owabaire Minisita Mpanga aziikwe gavumenti.

N’ebya Umaru Kashaka    
 
Purezidenti Yoweri Museveni yaragiira ngu omwabaire minisita kandi omuhangu omu by’obwegyese, Joyce Mpanga ofiire Orwamukaaga ebiro 18/11/2023 aziikwe gavumenti kandi omu kitinisa (official burial).

Milly Babalanda, Minisita w’enshonga z’obwa Purezidenti yarangiirira amakuru aga kurabira aha mukura gwe gwa X eriizooba.

“Ninyenda kumanyisa abantu ngu Purezidenti Museveni yayikiriza ngu owabaireho minisita w’eihanga ow’eby’obwegyese bwa Purayimare, Joyce Mpanga aziikwe omu kitinisa,” Babalanda arikurabira aha mukura gwa X.

“Akakiiko k’eihanga akarikuteebekanisa emikoro y’okuziika hamwe n’aba famire nibeija kushohoza puroguraamu. Ninyenda kushaasha n’aba famire hamwe n’abanya-Uganda boona,” Minisita arikwongyera kushoborora.

Okuziika Mpanga omu kitinisa nikimanyisa ngu gavumenti neija kushashura esente zoona ezirakoresibwe omu kuziika minisita kandi otwire narwanirira oburinganiza omu eihanga.

Okurugiirira aha ba famire, Mpanga naija kuziikwa ebiro 23/11/2023 aha mwanya ogu aba famire barikuziika abantu omuri Maya omu disiturikiti eya Wakiso aha ruguuto orwa Masaka.

Mpanga, afeereire ah’eirwariro erya Kampala Hospital aharwamukaaga ebiro 18/11/2023. Mpanga afeereire ahamyaka 90.

“Ayimukire nashaasha omu kifuba nikwo kumwirukangiza ahari Kampala Hospital kandi afiire yaheza kuhikibwa ah’eirwariro,” Dr. Florence Kasirye, murumuna w’omugyenzi arikushoborora.

Dr. Kasirye nagira ngu omugyenzi abaire ari empagi y’amaani omu famire. Niwe mwana w’okubanza kandi atukoriire buri kimwe. Nitwija kuguma nitumwijuka ahabw’ebi atukoriire,” Dr. Kasirye arikushoborora.

Nihaija kubaho okwinamira omugyenzi omwabazyo ogu omu maka g’omugyenzi agarikushangwa omuri Lungujja aharuguuto orwa Kintu-Musoke, Rubaga Divijoni omuri Kampala.

Aharw’okubanza, niheija kubaho okushabira omugyenzi ahakanisa ya St. Stephens Church, Lungujja, na bwanyima habeho okuteramira omugyenzi omu maka gye. 

Orwakabiri, niheija kubanza habeho okushabira omugyenzi Mpanga aha kanisa ya St. Paul’s Cathedral, Namirembe shaaha 8 z’eihangwe na bwanyima abantu bamwinamire ahari shaaha 1 y’omwabazyo omu maka gye.

#WestUpdates