China ehaire Uganda emotoka 70 z’okukoresa aharuteerane rwa NAM..

N’ebya Dallen Namugga na Sarah Nabakooza

Gavumenti ya China ehaire Uganda emotoka nsya 70 kubaasa kugihweraho omu kutambuza abagyenyi kuruga omu mahanga g’aheeru abarayetabe omu ruteerane rwa Non-Aligned Movement and Group of 77 orurikuza kuba omuri Kampala omu kwezi kw’okubanza, 2024.

Emotoka 70 z’ekika kya Black Maxus D 90 SUV zanjwirwe Orwakana ebiro 14/12/2023 aha kitebe kikuru kya minisiture y’eby’enguuto omuri Kampala.

Zimwe aha motoka 70 ezi China ehaire Uganda kugihweraho omu kutambuzi abagyenyi abararuge omu mahanga ga g'aheeru kwetaba omu ruteerane orwa NAM omuri Kampala omu kwezi kw'okubanza, 2024.

Arikwanjura emotoka ezi, ambasada wa China omu Uganda, Zhang Lizhong agizire ngu oruteerane oru nirwija kuhwera amahanga agakiri kutunguuka kweyongyera amaani omu bikwatiriine n’entunguuka.

Ambasada wa China omu Uganda, Zhang Lizhong agizire ngu oruteerane oru nirwija kuhwera amahanga agakiri kutunguuka kweyongyera amaani omu bikwatiriine n’entunguuka.

Nakyoreka ngu China neija kwoheereza tiimu 2 z’abahangu omu Uganda okwezi okurikwija kubaasa kutendeka ba makanika hamwe naaba dureeva aha bikwatiriine n’okureeberera emotoka ezi.

Emotoka ezihairweyo Orwakana zireteire omubaro gw’emotoka zoona ezi China ehaire Uganda zahika 140 omu myaka 3 ehingwire.

Ekicweka ky’okubanza ky’emotoka ezindi 70 zikaheebwayo omu mwaka gwa 2020. Obuhingwireho, Minisiture y’enshonga z’aheeru, ekyorekire ngu gavumenti ya India ehaireyo za baasi 10 ez’amaani hamwe naaza ‘Ambulance’.

Ahabw’okwenda kutambuza gye emirimo, Omuhandiiki w’entuura omu minisiture y’enshonga z’aheeru, Vincent Bagire agizire ngu Uganda neyetenga emotoka 1,200 ahabw’oruteerane orurikuza kubaho omu kwezi kw’okubanza, 2024.

Omu Uganda, gavumenti ebaasize kurundaana emotoka kuruga omu bitongore bya gavumenti bitari bimwe.

Bagiire aharwakaana agizire ngu gavumenti eine enteekateeka z’okugura emotoka ezindi 30 okwezi kwa 12 kutakahwire.

#WestUpdates