Museveni ashabire abariisa b’ente z’amate kwongyera omutindo omu mate.

N’ebya Beth Akatukunda

KIRUHURA

Purezidenti Museveni nashaba abariisa b’ente z’amate okuta amaani aha kushohoza amate g'esaano ahabw’okwenda kutunga akatare aha rurengo rw’ensi yoona.

Purezidenti ahaireyo okushaba oku obu abaire nabuganaho guruupu y’abariisa b’ente z’amate kuruga omu disiturikiti eya Kazo n’eya Kiruhura ah’eishomero erya Karo Primary School omuri Nshwere, omu disiturikiti eya Kiruhura nyomwebazyo ebiro 02/01/2024. 

Purezidenti Museveni abugaineho abariisa b'ente z'amate kuruga omu disiturikiti eya Kazo na Kiruhura Orwakabiri ebiro 02/01/2024.

"Murugye aha kushohoza amate gonka mutandikye kushohoza n’amate g’esaano mwaba nimwenda kutunga akatare. Eki mushemereire kukitwara nka kikuru munonga,” Museveni arikushoborora abariisa aha ku baine kutunga emihendo miruni y’ebintu byabo kuruga omu katare k’ensi yoona.

Museveni ashoboriire ngu Uganda neshohoza lita zirikwingana biriyooni 5 z’amate buri mwaka nikwo kushaba abariisa kutandika kwongyera omutindo omu mate gaabo baaba nibenda kutunga akatare k’ebintu byabo omu katare k’ensi yoona.

Purezidenti Museveni abugaineho abariisa b'ente z'amate kuruga omu disiturikiti eya Kazo na Kiruhura Orwakabiri ebiro 02/01/2024.

Purezidenti Museveni asiimire abariisa ahabw’okuhindura aha miringo y’okurisa omuri okuriisa omu mwanya gumwe ‘Zero grazing”.

Ayongiire yakyoreka ngu ekitongore ky’amate ga Uganda kikuzire kandi obu nibwo bwire bw’okukora aha nshonga y’okuburwa akatare k’ebintu ebirikuruga omu mate.

Purezidenti Museveni nabwo ahamisiriize ekyetengo ky’okwongyera omutindo omu mate gaabo arikwongyeraho ngu abahangu omu bya sayansi bariyo nibatamu amaani kubaasa kukora omubazi gw’okurwanisa engoha omu matungo.

Ashabire abeebembezi baaza disiturikiti omu eihanga okurugayo bakashomesa abantu aha kurinda eby’obuhangwa.

Purezidenti Museveni abugaineho abariisa b'ente z'amate kuruga omu disiturikiti eya Kazo na Kiruhura Orwakabiri ebiro 02/01/2024.

Aha rubaju rwe, Minisita w’eby’obuhingi n’oburiisa, Frank Tumwebazi agizire ngu okukora omubazi gw’engoha omu Uganda kuhikire aha bucweka 88 ahari 100.

Orukiiko oru rwetabirwemu Biishopu w’obureberezi bwa North West Ankole, Rt.Rev. Stephen Namanya, Omuny’ishengyero w’eishaza rya Nyabushozi, Wilson Kajwengye, Dayirekita w’ekitongore ky’omutindo gw’amate ekya Dairy Development Authority, Samson Akankiza n’abandi bingi.

#WestUpdates