Tintungire mugisha gw’okukora na Cecilia Ogwal, Museveni.

N’ebya Omushaki weitu

KAMPALA

Purezidenti Yoweri Museveni agizire ngu afeeriirwe omugisha gw’okukora n’omugyenzi Cecilia Atim Ogwal, obaire ari omuny’ishengyero-kazi wa Dokolo.

Obwo ashendekyereziibwe omukazi we kandi minisita w’eby’obwegyese n’emizaano, Maama Janet Museveni, Purezidentu Museveni aharw’okubanza ebiro 22/01/2024 ayinamiire omugyenzi Ogwal ofeeriire aha myaka 77.

Ogwal, otwire ari Omuny’ishengyero kuruga omu mwaka gwa 1996, afiire Orwakana ebiro 18/01/2024 omuri India kandi aitsirwe endwara y’ekookoro.

Arikugambira aha kwinamira omugyenzi Ogwal aha Paramenti, Purezidenti Museveni agizire ngu asaasire munonga ahabw’okushanga ngu tabaasize kukorera hamwe na Ogwal ahabw’eby’obutegyeki eby’okwebaganisamu.

Purezidenti Yoweri Museveni arikugamba aha mugyenzi Cecilia Ogwal oitsirwe endwara y'ekookoro omuri India aharwakana ebiro 18/01/2024. Photo by Maria Wamala.

“Nimpurira ninshaasha ahabw’eby’obutegyeki eby’okubaganisamu abantu. Titurabaasize kukora hamwe n’obu tubaire twine ebigyendererwa birikushushana,” Purezidenti Museveni arikushoborora.

“Timbaasize kukora na Cecilia Ogwal kwonka ninyenda kubagambira ngu buri kumbaire nimubugana ndeebera kimwe ngu nakunda eihanga rye,” Museveni arikwongyera kushoborora.

Purezidenti Museveni ashabire abany’ishengyero okukorera hamwe baheza kutunga omugisha na munonga aha nshonga ezikwatsire ah’eihanga.

Cecilia Ogwal naija kuziikwa aharwamukaaga ebiro 27/01/2024 omu makagye agarikushangwa omu disiturikiti eya Dokolo.

#WestUpdates