Omu Kenya nahiigwa ahabw’okugira akakwate omu kwita omushuubuzikazi

Omu Kenya nahiigwa ahabw’okugira akakwate omu kwita omushuubuzikazi

N’ebya Simon Masaba

Pooriisi eriyo nehiiga omu Kenya orikugambwa kuba aine akakwate omu kwita omushuubuzikazi omu disiturikiti ya Tororo.

Johnson Moses Mugwe, orikukora nk’omugambirizi wa pooriisi ahabw’ekyanga ekya Bukedi South yaagira ngu orikuteekateekwaho ni Robert Kanisho, enzaarwa ya Kenya.

Oitsirwe ni Beatrice Amoit, orikumanywa nka Ijuwa, 48, omushuubuzikazi omu tauni eya Mangen, ekyaro ekya Omiriai omugomborora ya Kalait.

Kurugiirira ahari Mugwe, ekikorwa eki kibaireho ekiro kya 9/2/2024 obu omubiri gwa Amoit gushangirwe enyima y’enju ye omushagama, gwine ebironda bishatu ahamutwe.

Nikigambwa ngu Kanisho ahungire yaaza Kenya bwanyima y’okugira akakwate omu kihagaro eki.

Okucondooza okwakozirweho nikworeka ngu Amoit atwire aine obuteikirizana na Kanisho. Aba bakatongana nyekiro nikwo kushanga omukazi afiire.

Omubiri gwe gutwirwe omukabafu ah’eirwariro erya Tororo kukyeberwa obwo okucondooza kurikugumizamu.

#WestUpdates