Okuziika omwiruki wa Kenya, Kiptum, n’okw’Orwakataano oru

NAIROBI 

Okuziika omwiruki rurangaanwa Kelvin Kiptum, owafeereire omuri butandu ya motoka okwezi oku kwairizibwa haihi kandi n’okw’Orwakataano oru, ab’ekibiina ekirikukurira emizaano erimu okwiruka nikwo baagira.

Okufa kwa Kiptum bwanyima y’ameezi makye ahenzireho ekyafaayo ky’ensi yoona kandi atakeejumbire omukwiruka okurikuza kuba omuri Bufaransa omururembo Paris, kutangaarize ab’eihanga rye hamwe n’ensi ey’abanyamizaano na munonga abairuki.

“Kevin naija kuziika Orwakataano ebiro 23.02.2024 owaabo omukyaro kya Chepkorio, Elgeyo, Marakwet,” Athletics Kenya nikwo baagira.

Wiiki ehwaire, abakuru bagizire ngu naija kuziikwa ebiro 24.02.2024 obwo arikukorerwa omukoro gwa Gavumenti.

Bongyeire baagira ngu Purezidenti William Ruto naija kuba ari ahakuziika kwonka ahabw’emirimo ye, omukoro guteirwe aharwakataano.

Kiptum, 24 kandi obaire ari ishe w’abaana 2 akagwa omuri butandu omukiro ky’ebiro 11.02.2024 haihi n’eka ye omuri Eldoret, ahi abairuki barikukira kutendekyerwa omuruhanga rugogoma omuri Burengyerwa-izooba bwa Kenya.

Omutendeki we ow’omunya Rwanda Gervais Hakizimana nawe akafeera omuri butandu kandi hoona omukazi ou babeire bainemu akatunga obuhuta

Kiptum akairuka ebiringwa omuri Chicago omubwire bw’eshaaha 2 n’obutikitiki 35 bwonka nikwo kuhenda ekyafaayo eki mutaahi we wa Kenya Eliud Kipchoge yaabeire ateireho arikumusingisa obutikitiki 34.

Ogu niwe abeire nateekateekwa kusingura omudaari gw’efeeza omumpaka za Olumpics eza Paris kandi abeire naija kuhayana na Kipchoge omumpaka zimwe 

“Omuringo murungi gw’okwinamira mwine-maawe n’okusingura empaka z’okwiruka ebiraingwa eza 2024 nkareeta obusinguzi omuka,” Kipchoge nikwo ahandiikire ahamukura gwe gwa intaneeti ogwa X (ogwabeire nigwetwa Twitter)

#WestSports