“Muze omu NRM ahabw’okuba eine omubazi gurikukora” – Museveni

N’ebya Omushaki Waitu

Dokolo:

Purezidenti Yoweri Museveni, ori Ceeyamaani w’eihanga ow’ekibiina ekya NRM yaashaba abantu ba Dokolo okuza n’okushagika ekibiina ekiri omubutegyeki ahabw’okuba kiine omubazi gw’okutambira ebizibu by’abanya Uganda.

Purezidenti ebi yaabigamba omwabazyo ogu ahakishaayi ky’eishomero erya Atabu Primary obu yaaba narondera obushagiki okwatsire ebendera ya NRM omukaruuru k’omuny’eishengyerokazi wa disiturikiti ya Dokolo, Ms. Janet Adongo Rose Elau.

Purezidenti eriizooba asiibire omuri Dokolo arikuronda obushagiki bw'owa NRM..(PPU Photo)

Akaruuru aka nikeija kuteerwa aharwakaana oru, 21/3/2024.

Entebe y’omunyeishengyerokazi wa Dokolo ekagumiraho bwanyima y’okufa kw’owabaire ari omuny’eishengyerokazi, Hon. Cecilia Atim Ogwal ahabiro 18/1/2024, owagwire India ahi yabaire naragurirwa.

Janet Adongo Rose Elau okwatsire ebendera ya NRM omu karuuru aka..(PPU Photo)

Purezidenti yaashaba abantu ba Dokolo kwejumbira omu puroguraamu ezi gavumenti ya NRM ebareteire ez’okubaiha omubworo n’okubareetera entaasya nka Emyooga, PDM n’ezindi.

Museveni yaagira ngu NRM niyo eine omubazi gw'ebizibu by'abanya uganda

Omukoro ogu gwahikwaho Nyampara wa Gavumenti, Hon. Hamson Obua, Minisita w’eby’amagara, Dr. Jane Ruth Aceng, Minisita w’eihanga w’okureebuza eby’esente, Hon. Beatrice Akello Akori n’abandi bebembezi omu NRM.

#WestUpdates