Omuntu omwe afiire, n’abandi 25 baatunga obuhuta omuri Iganga.

N’ebya Moses Bikala

IGANGA 

Omuntu omwe ahamiibwe kuba afiire n’abandi baingi baatunga obuhuta bwanyima y’okugwa omuri butandu ebaire omu disiturikiti eya Iganga. Abatungire obuhuta bairukangiziibwe omu eirwariro bari omu mbeera mbi.

Butandu egi ebaire omu kyaro kya Butende aharuguuto orwa Iganga kuza Bugiri ebaire erimu emotoka 6.

Fauza Nakasoo, orikukurira eirwariro erya Busesa health center IV naagira ngu baingi omu batungire obuhuta bacwekireho amaguru, emikono kandi batungire n’ebironda aha mibiri yaabo.

Butandu egi ebaire shaaha nka 3:30 z’omukiro ky’orwakabiri obu omuvugi w’emotoka ya FUSO Lorry ehandikirwe omu namba ya UAK 968L erikuza Iganga kuruga Bugiri kuremererwa bwanyima ya gumwe aha mupiira gw’emotoka egi kubaruka reero akataahira omu motoka endiijo eya Trailer ebaire neeruga omu maisho eya namba KEE 938 K –ZF 2135.

Sande Buyinza oyerebiire nagye butandu egi erikubaho naagira ngu butandu egi erugiriire aha muvugi w’emotoka ya FUSO obaire naavuga siipidi nyingi arikwenda kuraba aha motoka ezindi kandi obwo omuhanda gufunzire.

Emotoka 4 ezindi ezibaire zikuratiire FUSO kuruga enyima zoona zitomeriine ekisigire abashabaazi baingi n’obuhuta bw’amaani.

Omugyenzi amanyirwe nka; Jowelia Nakato, omushaho ah’eirwariro erya Busesa health center 4 omu disiturikiti eya Bugweri.

Mukuru w’eirwariro erya Busesa, Fauza Nakasolo naagira ngu baingi omu baretsirwe ah’eirwariro eri n’obuhuta bohoreeziibwe ah’eirwariro erikuru erya Iganga ahabw’okuba babaire bari omu mbeera ei eirwariro erya Busesa etarikubaasa kukoraho.

Omugambirizi wa Pooriisi ahabw’ekyanga ekya Busoga East, Diana Nandaula nashaba abavugi b’ebiruka okwerinda okuvugisa ekimama.

Ahitugiire kuhandiikira amakuru aga, emotoka ezibaire ziri omuri butandu egi zitwirwe aha Pooriisi enkuru eya Bugweri obwo okucondooza kumanya ekiretsireho butandu egi kurikugyenda omu maisho.

#WestUpdates