Aba FDC omuri Busoga bashabire Besigye kutandikaho ekigombe ekisya.

N’ebya Charles Kakamwa        

JINJA

Ba memba b’ekigombe kya FDC omu kyanga ekya Busoga, ab’omukigombe kya FDC eya Katonga bashagikire eky’okutandikaho ekigombe ekisya babaase kwehagura ahari FDC eya Najjanankumbi.

Za disiturikiti zoona 12 ez’omu kyanga eki erizimu n’orurembo rwa Jinja bateire akaruuru barikushagika eky’okutandikaho ekigombe ekisya barekyeraho kukora na FDC eya Najjanankumbi ngu ahabw’okuba erugire aha muramwa gw’ekigombe.

Encwamu egi kuruga omuri za disiturikiti ezi zihairwe aharwamukaaga omu rukiiko rw’okwebuuza aha bantu b’omu kyanga ekya Busoga. Orukiiko oru rubaire ah’eishomero erya Mpumudde Estate Primary School omu rurembo rwa Jinja kandi rwetabirwemu owatandikireho ekigombe kya FDC, Rtd.Col. Dr. Kizza Besigye,ba memba b’akakiiko akakuru aka FDC n’abany’ishengyero.

“Omu rukiiko rweitu rwa disiturikiti, tushaziremu kutandikaho ekigombe ekisya kandi ngu Col. Dr. Besigye atware obwebembezi bw’ekigombe ekisya,” ceeyamaani wa FDC ahabwa disiturikiti eya Kamuli, Asuman Mutaasa arikushoborora.

Ba memba b’ekigombe kya FDC omu kyanga ekya Busoga, ab’omukigombe kya FDC eya Katonga bashagikire eky’okutandikaho ekigombe ekisya.

Omu muringo nigwo gumwe, ceeyamaani wa FDC ahabwa disiturikiti eya Iganga, Hassan Muyinda naagira ngu omu rukiiko rwabo, ba memba b’ekigombe eki baikirize kuhatandikwaho ekigombe ekisya ahamwanya gwokuza omu biganiiro by’okugarukana nk’oku kibyabaire kigambirwe.

Abeebembezi boona aba disiturikiti ezindi abarimu; Charles Tonda (Luuka), Isiko Mpala (Jinja), Abbey Mwase (Jinja city), Babirye Mboowa (Buyende), Emmanuel Okori (Mayuge) na Abdallah Magumba (Bugiri) nabo babaire baine ensharamu nizo zimwe ezirugire omunkiiko zaabo.

#WestUpdates