Abariisa omuri Kiruhura bashongoirwe ahamutindo gw'amate, baaheebwa n'entandikwa.

N'ebya Ssenyomo Gideon

Nk'omuringo gumwe ogw'okuhwera abariisa ba Kirihura okwongyera ahantaasya yaabo, aba bashongoirwe aha okwongyera omutindo (value addition) aha mate.

Omushomo ogu guherize emyaka 2 kandi eizooba rya nyomwebazyo bahendeire emishomo yaabo omu butongore obwo barikuheebwa na ebikwato nikwo barwanise obworo kandi bongyere ahakutunga na sente nyingi.

Hon. Jovanice Rwenduuru n'abandi bakyara abahikire ahakuhendera kw'omushomo barikureeba bimwe ahabintu ebirikubaasa kuruga omumate bikareeta akasente. PHOTO: GIDEON SSENYOMO

Omushomo ogwatandikire omugwa 2022 n'ekigyendererwa ky'okwongyera omutindo aha mate gubeire guri omu magomborora nka Kinoni, Kyakashashara na Kikatsi kandi ebibiina ebirikubarirwamu abantu abarengire 150 nibyo bishongoirwe.

Okurugirira aha beebembezi ba Kiruhura, buriizooba disiturikiti netunga lita ezirengire 50,000 z'amate kandi abariisa nibabagura ahakabeeyi kakye, beitu ahabw'okushongorwa oku, eki nikiija kubahweraho kwongyera omutindo omumate kandi bakabaasa kugakoramu ebintu ebindi ebirikubaasa kurugamu empiiha.

Dr. Judith Nagasha kuruga ah'itendekyero rya Kyambogo University niwe ayebembeire okushomesa kw'okuhendera omushomo ogu. PHOTO: GIDEON SSENYOMO

Abashomesa barugire ah'itendekyero rya Kyambogo kandi bashagikirwe Swedish University of Agricltural Science.

Hon. Twinobusingye Jovanice Rwenduuru, omujwekyerwa omukazi omu ishengyero ahabwa disiturikiti ya Kiruhura niwe abaire ari omugyenyi mukuru kandi abashomesiibwe bashabirwe okukozesa ebikoosi byabo kushongora n'abandi.

#WestUpdates