Molly Katanga yazibirwa kwemererwa omu mushango gw’okwita iba.

N’ebya Farooq Kasule

KAMPALA – Omuramuzi wa kooti enkuru, Isaac Muwata eriizooba yazibira Molly Katanga kwemererwa omu mushango gw’okwita omushaija we, Henry Katanga.

Omuramuzi naagira ngu nk’oku omushango ogu guteirweho ebiro by’okuguhuririraho, kihikire omuramuzi kumuzibira kwemererwa.

Omuramuzi yagyendera aha mushango gwa Uganda Vs Francis Onebe.

Molly Katanga atwire aha rumanda kuruga ebiro 24/01/2024 obu ateebwaho omushango ogu. 

Aharwakashatu orwa wiiki ehwaire, okuhurira okushaba kwa Molly Katanga okw’okwemererwa kukahurirwa ahagati y’eby’okwerinda by’amaani bwanyima ya guruupu ya bantu ababaire bajwire T-shirts zirikwiragura ziriho ekishushani kya nyakujunaanwa (Molly Katanga) kugyezaho kutaaha omu kishengye kya kooti barikuhakanisa okuhurira okwemererwa kwe.

Peter Kabatsi, MacDosman Kabega, Elison Karuhanga, John Jet Tumwebaze na Bruce Musinguzi bashabire kooti kurekura nyakuteekateekwaho kuhisya obu barahurire okushaba kwe kwemererwa.

Aba bagizire ngu n’obugabe bwa Katanga kwemererwa kandi ngu baine n’abeema abahikire abarikwija kufayo kureeba ngu yaguma naaza omu kooti ahu yayetagirwa.

Abeema abu ahaireyo omu kooti barimu; John Patrick Kaboyo, Geoffrey Kamuntu, Maj. Gen (Rtd) Emmanuel Nyamunywanisa na Margaret Mugisa Muhanga.

Aha rubaju orundi, omuhwezi wa mukuru w’abahababi ba gavumenti Samali Wakooli, okwataniise n’abatonganirizi ba gavumenti abarimu; Jonathan Muwaganya na Anna Kiiza, bashaba kooti kubinga okushaba kwa Molly okw’okwemererwa.

Arikuha eky’okureberaho ky’omushango gwa Uganda Vs Francis Onebe, Wakooli yaagira ngu okurekura Molly kibaasa obutaba ky’oburinganiza.

Aha nshonga y’abeema, ab’orubaju oruhababi bagambire kooti ngu Kaboyo na Nyamunywanisa ti bahikire kwemerera ahabw’okuba barengize emyaka 75 abatashemeriirwe kubonabona n’okuza omu kooti.

Abahababi nibagira ngu ahabiro 02/11/2023 ahari Mbuya Chwa II Road omuri Nakawa divijoni omu rurembo rwa Kampala, Molly Katanga akaita omushaija we Henry Katanga.

#WestUpdates