Abashuubuzi baakingaho amaduuka gaabo omuri Kampala ahabw’enkora ya EFRIS.

N’ebya Moses Kigongo

KAMPALA- Nk’oku baraganiise nyomwebazyo omu rukiiko rw’abanyamakuru, abashuubuzi b’omu rurembo bakyera kukinga amaduuka gaabo barikuhakanisa eky’okukoresa enkora ya Electronic Fiscal Receipting and Invoice Solution (EFRIS) omu kurundaana omushoro gwa VAT kuruga omuri za bizinesi zaabo.

Omu kasheeshe k’orw’okubanza, abashuubuzi b’omu rurembo abarikwegaitira omu bigombe bitari bimwe omuri ekya KACITA, UATEA na KAAFO baraganiise kutaho akeesharingo k’okuhakanisa encwamu y’ekitongore ekya URA kutandiika kukoresa enkora eya EFRIS omu kurundaana omushoro kuruga omu bizinesi zaabo kutandika eriizooba ebiro 16/04/2024.

Amaduuka amaingi omu rurembo gakingireho kimwe kandi amaduuka makye nka g’enyama agu bakama baago bayiguraho kwihamu enyama ebikiremu aharuguuto orwa Nabugabo.

N’obusaasi bwingi, twasharamu kukinga amaduuka geitu okuhisya obu turabuganeho Purezidenti tukamugambira enshonga zeitu. Tukamanyisaho gavumenti ahanshonga ezi kumara akaire beitu tihaine kyakozirwe, Edward Ntale- omwe aha bashuubuzi kandi ceeyamaani w’ekigombe ekya UATEA arikushoborora.

Tukamanyisaho abakuru omu gavumenti abarimu n’omu kitongore ekya Uganda Revenue Authorities (URA') ahanshonga zeitu okuhisya obu turuhire tukasharamu kwesharinga omu busingye obwo tutegyeriize kubugana Purezidenti Museveni ou turikuteekateeka kubugana Orwakatano.

Embeera omu rurembo n’ey’obuteeka kandi harimu abashuubuzi bakye. Abashuubuzi barahiire kukora ekirikubasika kyona kureeba ngu enshonga zaabo zaakorwaho.

#WestUpdates