UCU ecuriire omukozi waabo ogwire omuri butandu ahari Nkumba.

N’ebya Henry Nsubuga

ENTEBBE- Eitendekyero ry’ebiragiro erya Uganda Christian University (UCU) School of Law ryinamiire omukozi waaryo, Raphael Okiot ofeereire omuri butandu ahari Nkumba roundabout aha ruguuto orwa Entebbe omu kasheeshe k’orwakashatu ebiro 17/04/2024.

Okiot afiire obu abaire ari omu motoka ye ehandiikirwe omu namba ya UBQ 371P ayemeriire aha bitaara by’ahanguuto ahari Nkumba ahi ekimotoka ekirikusa enkogote kiremirwe kusiba kityo kikagwera emotoka ye.

Assoc. Diini w’eitendekyero ry’ebiragire, Miriam Achieng agambiire omunyamakuru weitu ngu Okiot abaire amaziire emyaka 5 arikushomesa ah’eitendekyero eri.

“Okiot abaire ari nakunda kukora n’amaani kandi omukozi obaire nakira kukwata obwire omu bikwatiriine n’okukora emirimo ye. Nitushaasha ahabw’okufa kwe kandi itwe nk’eitendekyero, tufeeriirwe omuntu w’omugasho,” Achieng arikushoborora.

Omuhwezi wa registrar ahabw’eitendekyero eri, Clair Arinaitwe Mwebaze naagira ngu aharwakabiri, babaire baine Okiot kandi aharwamukaaga, bakakoresa abeegi ‘interviews’ ahi Okiot abaire ari omwe aha babaire nibabuuza abeegi.

Tonny Tumukunde, Siipika w’ekigomve ky’abeegi abashomiire UCU kandi owashomiireho na Okiot omu kibiina kimwe naagira ngu bakaba bari abanywani munonga barikusheka hamwe, okushoma hamwe n’okukyakara.

“Tukaba nituraara hamwe twaheza kugaruka ekiro kuruga omu kushemererwa. Tukahona okufeera omuri butandu eyabaireho harikuburayo ebiro bikye kuhika aha mukoro gwangye gw’okwanjura. Ndebire okubabaire nibatema emotoka kukwihayo kandi ndeebire ngu amagara aga ni busha! Mukama akuhuumuzegye,” Tumukunde arikurabira aha mukura gwe gwa X.

#WestUpdates