Abashuubuzi beigwireho bizinesi zaabo bwanyima y’okubuganaho Purezidenti

N’ebya Isaac Nuwagaba

Kampala:

Abashuubuzi omuri Kampala bemereize akeesharingo kaabo beiguraho za bizinesi zaabo bwanyima y’abeebembezi baabo kubuganaho Purezidenti Museveni aharwakataano.

Abashuubuzi omuri Kampala babaire nibesharinga obwo barikwetomboitira ekitongore ekya URA kwongyera omushoro hamwe n’enkora eya EFRIS omu kurundana omushoro ahamishuuburo omuri Kampala.

Bizinesi omuri Kampala zigarukiremu bwanyima y'abashuubuzi kuhendera akeesharingo kaabo..(photo By Isaac Nuwagaba)

Abashuubuzi aba abakingireho amaduuka n’obutare babaire nibagira ngu enkora ya EFRIS tiy’oburingaaniza ahabw’okuba nibashashura emishoro kabiri.

Aba babaire nibashaba Gavumenti okutaho emiringo endiijo y’okurundaniramu omushoro.

Kurugiirira ahari Ceeyamaani w’ekigombe ky’abashuubuzi omuri Kampala ekya KACITA, Thaddeus Musoke, encwamu y’okugarukamu kwiguraho bizinesi zaabo eizireho bwanyima y’okubuganaho Purezidenti Museveni omumakagye g’obwa Purezidenti omuri Entebbe aharwakataano.

Dr. Thadeus Musoke Nagenda, Ceeyamaani w'ekigombe ky'abashuubuzi ekya KACITA...(Photo by Isaac Nuwagaba)

Omu rukiiko oru, Purezidenti Museveni aragaanise okuzondooza ahanshonga egi kandi naija kuba nabuganaho abashuubuzi boona ahabiro 7/5/2024 ahakishaayi ekya Kololo Grounds.

Gavumenti eikirize kuba eyemereize enkora eya EFRIS nikwo n’abashuubuzi kwikiriza kuhendera akeesharingo kaabao bakagaruka bakaiguraho bizinesi zaabo.

Abashuubuzi babaire nibesharinga ahabw'emishoro n'enkora eya EFRIS...(photo By Isaac Nuwagaba)

Minisita w’enshonga eza Kampala n’emyanya egyetoreire, Hajjati Minsa Kabanda naasiima abashuubuzi ahabw’okuhendera akeesharingo kaabo n’okwiguraho bizinesi kubaasa kuheereza abanya Uganda.

#WestUpdates