Emirimo ey’abantu barikukorera omubisharara ereteire amaizi gakyendeera omu migyera- Musingwire.

Muhaburane Levi

MBARARA

Ekitongore ekya World Wild Fund (WWF) kikwataniise n’ekirikujunanizibwa aha kurinda enyamaishwa z’omukishaka omu eihanga ekya Uganda Wildlife Authority hamwe n’ekya Wildlife Clubs Uganda batongoizeho purogyekiti ya Green Schools egyenderiire kurinda eby’obuhangwa na munonga ebyehinguririize amarindiro g’enyamaishwa.

Purogyekiti egi egyenderiireho kumaraho ebizibu ebirikureetwaho okutaahirira eby’obuhangwa nk’omwegyemure, ebitengure, ekyanda kiringwa n’ebindi kandi neija kukorwa omuri za disiturikiti 5 eziheeriine n’amarindiro g’enyamaishwa eya Bunyangabu, Kasese, Rubirizi, Ntoroko na Kabarole.

Omukoro gw’okutongoza purogyekiti egi okwetabirwemu abarikukwatwaho omukurinda eby’obuhangwa ogubaire ah’eishomero erya Kinyampunika Primary School omu disiturikiti eya Bunyangabu nyomwebazyo, Happy Ali- orikukurira eby’empurizana omu kitongore ekya WWF naagira ngu amashomero garikurenga omuri 35 ag’omuri za disiturikiti 5 eziheeriine amarindiro g’enyamaishwa nk’erya Kibaale, Queen Elizabeth hamwe Rwenzori Mountain National Park nigo garikuza kuganyirwa omu purogyekiti egi.

Alice Natukunda, Community Conservation Warden ah’eirindiro erya Rwenzori Mountain National Park naagira ngu batwire baine ekizibu ahi abatuura n’amashomero batwire nibataahirira ebibira n’amarindiro.

Ahabw’enshonga y’okwenda kumariraho kimwe okutaahirira eby’obuhangwa, abanyamakuru kuruga omu kyanga ekya Ankole nabo bateireho ehururu y’okubyara emiti omu matendekyero g’eby’obwegyese kworekyerera abaana b’amashomero n’eminyeeto ngu okurinda eby’obuhangwa ni kikuru munonga.

Obwo barikugyendera aha muramwa gw’okukuza ekiro ky’abanyamakuru eky’omwaka ogu ekya World Press Freedom Day ogwa A press for the Planet, Journalism in the face of Environmental Crisis, abanyamakuru aba bashaziremu kuta omunkora ebi batwire nibahandika barikwegyese abantu aha mugasho gw’okurinda eby’obuhangwa. 

Aba babyire emiti ah’eishomero erya Uganda Martyrs Primary School hamwe na The University of Saint Joseph Mbarara.

Abanyamakuru omuri Mbarara barikubyara emiti ah'eishomero erya Mbarara Martyrs Primary School omuri Mbarara aha kujaguza ekiro ekya World Press Freedom Day. Photos by Muhaburane Levi.

Rev. Fr. Dr. Deusdedit Karemire, Omuhwezi wa Chancellor wa University of Saint Joseph Mbarara asiimire gavumenti ahabw’amaani agu eteiremu omu kugyezaho kurinda eby’obuhangwa. Nabwo, asiimire abanyamakuru ahabw’okuba eky’okureeberaho omu kurinda eby’obuhangwa.

Jeconious Musingwire, Omuhangu omunshonga z’eby’obuhangwa kandi owakuriireho ekitongore ky’eby’obuhangwa ekya NEMA naagira ngu emirimo ey’abantu barikukorera omu myanya y’ebisharara nk’okuhingamu, okutema emiti n’ebindi bireteire amaizi gakyendeera omu migyera nk’ogwa Rwizi, Mpanga na Katonga. 

Omugyera gwa Rwizi oku gurikushushamu.

Musingwire nashaba ebitongore byona ebirikukwatwaho okurugayo bikejumbira omu kurinda emyanya y’eby’obuhangwa. 

Jeconious Musingwire, Omuhangu omu by'okurinda eby'obuhangwa arikushoborora aha mugasho gw'okurinda eby'obuhangwa.

Nahamisiririza omugasho gw’okushomesa abantu ahandengo zoona kureeba ngu abantu bamanya ahabw’enki baine kurinda eby’obuhangwa. 

Musingwire nashaba kuhateebwaho emiringo nk’okubyara emiti eyakubaasa kuhweraho omu kugwisa enjura n’okureeba ngu abantu batunga ah’okwiha amaizi.

#WestUpdates
#EnvironmentConservation