“Mwebare omurimo ogu murikokorera eihanga,” abanyamahurire basiimirwe

“Mwebare omurimo ogu murikokorera eihanga,” abanyamahurire basiimirwe 

N’ebya Job Namanya Apuuli

Kabale:

Abanyamahurire basiimirwe ahabw’emirimo yaabo hamwe n’obuheereza burungi bw’okuhitsyaho abantu amakuru omu eihanga.

Ebi bigambirwe Minisita w’enshonga za Purezidenti, Milly Babirye Babalanda ahamukoro gw’okujaguza ekiro ky’obugabe bw’abanyamahurire omuri Kabale nyomwabazyo.

Minisita Milly Babalanda niwe abaire omugyenyi mukuru...Photo by Job Namanya Apuuli

Omukoro gw’okujaguza ekiro ky’abanyamahurire omunsi yoona omuri Kabale gubaire omukishaayi kya Kabale Stadium kandi guhikirweho abeebembezi batari bamwe.

Minisita Milly Babalanda niwe abaire ari omugyenyi mukuru kandi abaire ashendekyerezibwe Minisita ow’eby’amakuru na karimagyezi, Dr. Chris Baryomunsi n’abandi bebembezi.

Minisita Babalanda abaire ashendekyerezibwe Dr. Chris Baryomunsi...Photo by Job Namanya Apuuli

Abanyamakuru hamwe n’abagyenyi bakuru babandize okubyara emiti nk’oku omutwe gw’omwaka ogu, nabwanyima batambwire omu tauni ya Kabale obwo bebembeirwe band.

Omugyenyi mukuru aheerize yaiguraho ofiisi z’abanyamakuru ab’ekigombe ekya Kabale Media Fraternity omu tauni Kabale.

Esther Ayebazibwe Chairperson w’abanyamahurire ahabwa Kabale agambire ba minisita ebizibu by’abanyamakuru ebi barikurabamu namunonga ahanshonga z’okushashurwa kubi.

Ahamukoro ogu, babandize n'okubyara emiti...Photo by Job Namanya Apuuli

Abeebembezi naabo bagambire ahabuheereza bw’abanyamahurire omukyanga.

Minisita Milly Babalanda asiimire abanyamakuru ahabw’obuheereza burungi obu barikuheereza eihanga kandi abahaire miriyooni 3 okubayambaho omu purogyekiti zaabo.

Ekiro ky’obugabe bw’abanyamakuru omunsi yoona nikijaguzibwa ebiro 3/5 burimwaka.

#WestUpdates