Museveni yaashaba Japan kushagika Uganda omukwongyera omutindo omu bintu.

N’ebya Beth Akatukunda

ENTEBBE

Purezidenti Yoweri Museveni eriizooba Orwakashatu yaabuganaho minisita w’enshonga z’aheeru omuri Japan, Hayashi Yoshimasa n’abajwekyerwa abandi abu yaija nabo aha maka g’obwa Purezidenti, Entebbe.

Ekiganiiro kyabo kyaba kiri munonga aha ku Japan yaakubaasa kushagika Uganda na munonga omu by’okwongyera omutindo omu bintu byayo.

Purezidenti Yoweri Museveni arikubuganaho abajwekyerwa kuruga omu eihanga erya Japan. PHOTO: PPU.

Purezidenti yaagira ngu eki nikibaasa kuhikiirira abanyamyoga omu by’entunguuka omu eihanga erya Japan baaheza kwija omu Uganda bakakoreramu bizinesi batagiire kwiha ebikozesa nari shi “raw materials” omu mahanga g’aheeru ekirikureetera Uganda na Africa yoona okutwariza hamwe gataakura.

Museveni yaagambira abagyenyi be ngu eby’entaasya y’amahanga ga Africa ebirikwingana obusiriira 2 n'obucweka 7 omuza doora ni bikye wagyera-gyeranisa n’eby’entaasya ya Japan, Germany na India.

Purezidenti Yoweri Museveni arikubugana abajwekyerwa kuruga Japan aha State House, Entebbe. PHOTO: PPU.

Purezidenti naagira ngu oihireho Uganda kugira abantu baingi abarikwingana miriyooni 46, eby’entaasya byayo tibikaboneire.

Yayongyera yagambira Hayashi ngu okuhisya omu mwaka gwa 2013, abanya-Uganda abarikuhika obucweka 32 ahari 100 nibo babaire nibejumbira omu by’entaasya ebirikurugamu esente beitu ahabw’amaani agu gavumenti eyongyeiremu, omubaro gw’abantu abari omu by’entaasya ebirikurugwamu esente bateerizemu kabiri.

Purezidenti Yoweri Museveni arikubugana abajwekyerwa kuruga Japan aha State House, Entebbe. PHOTO: PPU.

Aha niho Museveni yashabira kampuni z’amakorero eza Japan okwija zikakorera bizinesi omu Uganda babaase kwongyera omutindo omu bintu bya Uganda nk’omwani.

Purezidenti Museveni yagaruka yaashaba minisita w’enshonga z’aheeru omuri Japan okutunga za kampuni ezirikubaasa kwija omu Uganda zikakora amanda ga motoka (car batteries).

#WestUpdates