NSSF baahabura abakozi omuri Bunyoro ahakubiika sente

NSSF baahabura abakozi omuri Bunyoro ahakubiika sente

N’ebya Wilson Asiimwe

Ekibiina ekirikubiikira abakozi sente kya National Social Security Fund (NSSF) kyashaba abakozi abarikukoresibwa Gavumenti n’abandi bakozi kukunda okubiika sente nk’omuringo gumwe gw’okwetebeekanisiza okuhuumura emirimo omumyaka ya bukuru.

Geofrey Waiswa Ssajabi, orikukurira eby’obushuubuzi omu NSSF eriizooba Orwakashatu obwo bari omurukiiko rw’abakozi omururembo Hoima yaagira ngu abantu abaingi tibarikwetebeekanisiza okuhuumura emirimo yaabo ekintu ekirikubarugiiriramu oburemeezi bwanyima y’okuhuumura emirimo yaabo. 
“Abantu abaingi tibeetebeekanisize kurungi orugyendo rw’okuhuumura kwabo kandi eki n’ekintu kibi munonga, ahabw’okuba abantu nk’abo ku barikuruga ahamirimo, nibatuura amagara mabi munonga. Tweheireyo kureebeka ngu twashagika abantu omukureebeka ngu baabiikira nyensya,” Ssajabi nikwo yaagira. 

Ssajabi hoona yaayongyera yaashaba abakoresa kureebeka ngu baatooraho kandi baayanjura sente zoona ez’abakozi baabo omu NSSF.
Yaagira ngu bwanyima y’okugaruka omukiragiro kya NSSF omukwezi kw’okubanza omugwa 2022, obwa hati nibaikirizibwa kuha obuheereza bw’okubiikira abakozi boona abarikukora na gavumenti hamwe n’abandi bakozi. 
Ssajabi yaagira ngu okurugiirira ahakiragiro ekisya (NSSF Amendment Act 2022) buri muntu weena nabaasa kubiika na NSSF ahabwa nyensya yaabo baaheza kuhuumura emirimo.  

Patrick Ayota, orikwebembera ekitongore kya NSSF, kandi owaahayo ebirugire omumirimo yaabo aharukiiko oru, hoona nabwo yaayoreka ekigyendererwa ky’obushagiki oburikwija kuba nibuheebwa abashuubuzi aba buriijo kwenda ngu batunguukye kandi bahangyeho n’emirimo endiijo. Ogu yaayongyera yaayoreka emirimo yaabo ekozirwe omukushagika eby’amagara hamwe n’eby’obwegyese
“Nk’ekitongore, tutwaire nitutunguuka kurungi kandi omukyanga ekya Bugwa-Izooba bwa Africa turiyo nitukora kurungi munonga. Eby’obugaiga bwaitu ebi turikukoramu sente ebirikuhika ebicweka 80 ahari 100 biri omumuringo ogurikwija kushashurwa amagoba bwanyima y’obwire buringwa (Treasury Bonds), twine emigabo erikuhisya ebicweka 12 ahari 100 omumakampuni gatari gamwe na gamwe ebicweka 8 ahari 100 biri omubyombeko n’amataka (real estate),” Ayota nikwo yaagira.

Albert Byarugaba owaajwekyera ab’amagyani kuruga Bugambe yaagira ngu NSSF bashemereire kureebeka ngu abakozi boona beehandiikiise na NSSF ahabw’okuba abanda tibarikwanjura bakamanyisa ku beehandiikiise.
“Twine ekizibu ahi bamwe omubakozi bangire-nkana kwehandiikisa na NSSF kandi eki kibaasa kubareetera oburemeezi. Nitushaba NSSF kukuratiriza abakozi nk’abo kandi bareebekye baayehandiikisa,” Byarugaba nikwo yaagira

#WestUpdates