Abakozi batandikire kwebika kutunga esente za NSSF- Ayota.

N’ebya Jackson Kitara

GULU

Mukuru w’ekitongore ekya National Social Security Fund (NSSF), Patrick Ayota, ayorekire ngu abakozi batandikire kwebika ngu bafiire kwenda ngu babaase kutunga esente zaabo za NSSF.

“Hariho abakozi baingi abariyo nibebika ngu bafiire obwo barikuza omu kitongore ekirikujunanizibwa aha kuhandiika n’okugaba endanga muntu ekya National Identification and Registration Authority (NIRA) kutunga ‘certificate’ y’okuhamya ngu bafiire kwenda ngu batungye esente zaabo za NSSF beitu tushangire ngu abantu abo bakihuriire ahabw’okuba nibakoresa ebinkumu byabo,” Ayota arikushoborora.

Ayota naagira ngu obwa hati, okutunga esente za NSSF ez’omuntu owafiire nikitwara obwire buringwa ahabw’okuba abakuru baaba nibakora aha sente z’omuntu ogwe, nibabanza bataayaayira amaka kureeba ekituuro oteireho n’okubuuza abeebembezi b’ekyaro n’abariraanwa kuhamya yaaba n’amaziima omuntu ogwo akafa.

“Abakozi abaingi batwire nibashaba kutunga esente zaabo bakiri bato n’okuba bakiine amaani. Waaba okiri muto kandi oine amaani, nikimanyisa ngu nobaasa kukora n’amaani obaase kukiza n’esente ezi orikutunga hati, torikwetenga kutwara hati esente ez’obikiire nyensya,” Ayota arikushoborora.

Ayota naagira ngu omu eihanga ryoona, abakozi okushashura esente omu kitongore ekya NSSF kwemeriire aha bucweka 57 ahari 100 ekirikumanyisa ngu abakoresa hati nibatayo esente ezi omu bwire kandi omu bwijwire bitakarengire ebiro 20 bya buri kwezi.

Naagira ngu ekireteire habaho okushashura esente omu NSSF omu bwire n’ahabw’okutaho entebeekanisa ahi abantu barikuhababira abakoresa abatarikushashura esente za NSSF ez’abakozi baabo bataine kibarikumanya.

Ayota naagira ngu omukoresa yaheza kuhababirwa, nibamucondooza kandi bashanga ngu atwire atarikutayo esente z’abakozi be omu NSSF, nibamuheereza obwire bw’okushashura esente ezo kandi yaremwa natwarwa omu kooti ajunanwa.

Agambire ebi obu abaire ari omu rukiiko rw’abakoresa oruteebekanisiibwe ekitongore ekya NSSF ahari Bomah Hotel omu rurembo orwa Gulu aharw’okubanza ebiro 13/11/2023. 

Orukiiko oru rwetabirwemu abakoresa kuruga omu byanga nk’ekya West Nile, Acholi hamwe na Lango.

#WestUpdates