CDF Muhoozi yaaraganisa kurwanisa enguzi n’enkoresa mbi y’ebintu omumahe

N’eby’omushaki waitu

Gen. Muhoozi Kainerugaba orikukira kwetwa MK yaaraganisa kuhindura omumuringo murungi embeera y’abaserukare arikurwanisa enguzi hamwe n’enkoresa mbi y’ebintu omumahe.

Okuraganisa oku yaakukora obu yaaba naayakiira obushoboorozi nka mukuru w’amahe kuruga owa Gen Wilson Mbasu, hoona oherize kuheebwa obwa minisita enshumi nkye ehwaire.

Orwakana, eriizooba ebiro 28.03.2024 okuhayo ofiisi oku kwaba ahakitebe kikuru ky’enkambi ya 4 omu disiturikiti ya Gulu kandi kwakurirwa omuhabuzi wa purezidenti ow’omutaano ahanshonga z’eby’okwerinda Gen Caleb Akandwanaho orikukira kumanywa nka Salim Saleh. Saleh kandi nabwo niwe arikukurira eby’okushugaanisa enkora ya Gavumenti eya Operation Wealth Creation.

Saleh yaatabaarusya ababiri aba, owaaza omu ofiisi n’owaagirugamu ahamirimo yaabo kandi yaabashaba kugumizamu barinzire gye amagara gaabo.

Yaayongyera yaabahiga kuhamya empagi ezi z’obutungi ezi Purezidenti Museveni arikwebembeza kandi ezo ni okurinda amagara hamwe n’ebintu by’abantu kutaho empinduka omuby’obugaiga bw’abantu

Muhoozi kandi hati ori mukuru w’amahe aga owa 13, yaaraganisa UPDF ku encuro ye erikuza kugumizamu erikukoresa obujunaanizibwa, ey’emicwe kandi ekore n’ahabizibu by’eby’okwerinda.

Muhoozi, 49, yaagira ngu, “amahe ga UPDF nigagumizamu kuba empagi mpango y’eihanga agu abanya Uganda boona barikutamu ekitiinisa. UPDF nikyo kitongore ekirikora eihanga rya Uganda kandi n’eky’abanya Uganda boona.”

Yaasiima obaire ari mukuru w’amahe ahabw’omurimo ogu akozire ahabw’okwombeka eihe ry’obujunaanizibwa kandi ery’omurembe kandi hoona yayongyera yaashaba abaserikare kwetantara omuze gw’okubaraata barikuteekateeka ngu baahikire ahari buri kimwe.

Mbadi kandi hoona nawe yaakurusya Muhoozi kuhika ahamurimo gwe omusya, “Ninkukurusya ahabw’okuba murungi okashemeza abarikuha obushoboorozi”.

Mbadi yayongyera yasiima Purezidenti Yoweri Kaguta Museveni ahabw’okumwikiriza kuba omuheereza ahamutwe gw’eihe ry’eihanga.

Omukoro ogu gwahikwaho abakungu batari bamwe na bamwe omukitongore ky’eby’okwerinda. 

#WestUpdates