Omuduumizi wa ADF ondiijo aitiirwe omu muhigo gwa Shujja.

N’ebya Omushaki weitu

Amahe ga UPDF gakwataniise n’aga Democratic Republic of Congo (FARDC), nyomwebazyo ebiro 08/04/2024 gaitsire omuduumizi w’abahekyera ba ADF kandi omushaho wa guruupu egyo orikumanywa nka ‘Dr’ Musa.

'Dr' Musa aitiirwe omu muhiigo gwamakwatane ogukozirwe ahari Mugulumugulu haihi na Tokomeka, kiromita 30 kuruga omu myanga ekya Bukizi bwa bumosho Burengyerwa-Izooba bwa Kainama.

'Dr' Musa, ori enzaarwa ya Rwanda ahu aitiirwe abaire nakorera hamwe n’omuduumuzi w’abahekyera ondiijo orikumanywa nka Muhammad Luminsa.

Amahe gamakwatane gazoire n’emundu ey’ekika ekya SMG hamwe na Radio emwe y’omungaro (walkie-talkie). 

Omugambirizi w’omuhiigo ogwa Shujja, Maj. Bilal Katamba naagira ngu omuhiigo gw’okurwanisa abahekyera ba ADF nigugumizamu kuhisya obu barahwereho kimwe omu kicweka ekyo.

#WestUpdates