Omukazi kushashura iba miriyooni 10 ahabw’okubyama n’omushaija ondiijo.

N’ebya Omushaki weitu

GULU- Kooti enkuru omuri Gulu eragiire omukazi osingisiibwe omushango gw’okubyama n’omushaija ondiijo aheeru y’obushwere bwabo okushashura omushaija we shiringi miriyooni 10 bwanyima ya kooti kusharamu ngu ababiri abo bataane omu bushwere obu babaire bamaziremu emyaka 10.

Omuncwamu ye, Omuramuzi wa kooti egyo, Phillip Odoki aragiire Proscovia Acayo okugaruza esente ezo ow’omushaija we, Robin Meaton- enzaarwa ya Denmark, kimwe kya kabiri ky’esente ezi Meaton yahaireyo kwombeka enju ahari Ariaga omu disiturikiti ya Gulu.

Ebihandiiko bya kooti nibyoreka ngu eitaka rikaheebwa Meaton aba famire ya Acayo bwanyima y’ababiri aba kuza hamwe omu bushwere oburikwera ahabiro 27/11/2014. Omushaija ogu (Meaton) akahayo shiringi miriyooni 20 z’okwombeka enju eh’eitaka eryo.

Omuramuzi Odoki ashaziremu ngu ababiri bataane bwanyima ya Meaton kutwara omushango omu kooti.

Meaton agambiire kooti ngu mwaka gwa 2016, omukazi we (Acayo) akabyama n’omushaija ondiijo aheeru y’obushwere bwabo kandi ngu kuruga obwo batwire batarikutuura hamwe.

Acayo tihaine kwetongonaho kwona oku ahaireyo omu mushango ogu.

#WestUpdates