Owa boda akubye munne eng’uumi mu Owino n’afiirawo

POLIISI eyigga omuvuzi ba bodaboda amanyiddwa nga Mukiga akolera ku siteegi ya Owino (St. Balikuddembe), agambibwa nti yakubye munne eng’uumi n’emusowolayo olulimi n’agwa wansi. Baagenze okumutuukako ng’afudde.
Bashir Muwonge 34, eng’uumu Mukiga yagimuggundidde ku siteegi y’oku luguudo lwa Kafumbe Mukasa okuliraana omulyango oguyingira akatale ka St. Balikuddembe. Kigambibwa nti yabadde atikka omusaabaze ku siteegi yaabwe kw’atakolera.
Muwonge eyattiddwa abadde yaakakuba mukyala we Janate Lutaaya embaga, ng’ali lubuto.
Amyuka omwogezi wa poliisi mu Kampala n’emiriraano, Luke Owoyesigyire yannyonnyodde bannamawulire nti Muwonge yafunye obutakkaanya ne Mukiga nga buva ku musaabaze nga Mukiga ne banne bagamba nti Muwonge yabadde ‘lubyanza’ nga tebayinza kumukkiriza kutwala musaabaze kuba takolera ku siteegi yaabwe. Owoyesigyire yagambye nti wakati mu kusika omuguwa, Mukiga n’akuba Muwonge ekikonde n’agwa wansi n’afiirawo. Mukiga yadduse, nga kati poliisi emunoonya.
Omu ku basuubuzi eyababaddewo yategeezezza nti,
omugenzi Muwonge yaleese omusaabaze omukyala ku mulyango oguyingira akatale ka Owino okugula ebintu n’amulindira wabweru okumala eddakiika nga 30.
Kyokka banne abakolera okumpi n’omulyango oguyingira mu kibangirizi kya Cocoyard mu Owino, abaakulembeddwa eyeeyita ssentebe wa siteegi eno, eyategeerekeseeko erya Alex n’omulala amanyiddwa nga Mukiga olwamulabye ng’agenda okutikka omusaabaze ne bamulumba ng’enswera enkubeko ne batandika okumusika ebitogi.
Omugenzi yalaajanye waakiri okubawa 2,000/- ze yabadde atikkidde omusaabaze kyokka Mukiga n’amukuba ekikonde eky’amaanyi mu mimiro ekyamusowodde olulimi n’afiirawo. Zaabadde ssaawa nga 1:30 ez’akawungeezi era wakati mu kavuyo k’okugezaako okumuyoolayoola bataase obulamu bwe, n’abaamukubye we beemululidde ne badduka.
Omu ku booluganda lw’omugenzi, Mulema Kavuma ne nnyina Jane Namyalo, omusuubuzi w’emicungwa ne mangada mu Owino, baayanguye okutuuka mu kifo kino era bye baalabye babinyumya bati;
Olwafunye amawulire g’okufa kwa Muwonge ne tusitukiramu okuzuula ekituufu era be twasanzeewo batutegeezezza nti omugenzi yattiddwa aba bodaboda abakolera ku mulyango olw’okuba nti yabadde agezaako okutikka abasaabaze.
Ffamire y’omugenzi yagguddewo omusango gw’obutemu ku poliisi y’oku Owino ku ffayiro SD: 50/18/10/12/2022 era nga ne pikipiki gy’abadde avuga nnamba UET848H gye yatwaliddwa. Muwonge yaziikiddwa mu limbo e Nkoowe ku Ssande akawungeezi.