Mariam Ndagire awadde Moses matovu, Annet Nandujja ne Irene Namatovu dipuloma

MARIAM Ndagire asiimye emirimu gy’abantu abaludde mu kisaawe ky’ebyamassanyu olw’omulimu ogw’ettendo gwe bakola. 

Yasinzidde ku matikkira g’essomero lye eritendeka bannabitone erya Mariam Ndagire Film and Performing Arts Center ku Bat Valley Theatre mwe yatikkiridde abayizi 42 abakuguse mu kuzannya emizannyo, okuyimba, kulongoosa ebifaanayi n’ebirala n'asiima Moses Matovu, Irene Namatovu ne Annet Nandujja be yawadde dipuloma olw’ebyo bye bakoze mu kisaawe ky’okuyimba.

Ndagire Ng'ayogera Ku Mukolo Gwamatikkira Ku Ttendekero Lye.

Johnson Turyamwesimira Owa Dit Ng’akwasa Moses Matovu Satifikeeti Wakati, Awerekeddwaako Abby Mukiibi Ku Ddyo.

Mariam Ndagire Asiimye Emirimu Gy’abantu Abaludde Mu Kisaawe Ky’ebyamassanyu Olw’omulimu Ogw’ettendo Gwe Bakola. 

Abamu Ku Batikkiddwa

Ono era yeebazizza abazadde olw’okwongera okuwagira abaana, okuzuula n’okutumbula ebitone byabwe n'agamba nti bbo weebakulira ng’omuzadde okuwulira nti wagenze kuzannya mizannyo oba kuyimba olwo ng’amanya oyagala kwewaggula, ng'akukuba emiggo emiyitirivu kyokka kimusanyusa nti kati abazadde basobola okuwagira abaana baabwe okugenda okusoma ebintu ebyo. 

Johnson Turyamwesimira Principal w’ebyobukugu okuva mu kitongole kya Directorate of Industrial Training (DIT) eyawadde abatikkiddwa dipuloma yeebazizza Ndagire olw’ekirowoozo kyeyafuna okukola essomero eribangula bannabitone kubanga bangi abali mu mulimu ogwo kati tebaagusomerera nga kino kyakubayamba. 

Yasinzidde wano n'asaba bannabitone abalala abalina ku ssente okukoppa Ndagire bongere okuzimba amatendekero olwoo emijiji emito gibangulwe.