Ebika by’emiddo 10 egigoba ensiri

EBIMU ku bimera ebigoba ensiri kuliko:
1. Kalittunsi: Olw’okuba kalittunsi anywa amazzi, bw’omusimba kiyamba okumalawo amazzi agalegama ekiziyiza ensiri okwalulirawo.
2. Akayuukiyuuki:
Ebikoola by’akayuukiyuuki bigoba ensiri mu maka go kubanga tebyanguyira nsiri ku bigwako wadde okubizaalirako nga n’akawoowo akabivaamu kazigoba.
3. Omuti gw’enniimu: Guno osobola okugusimba okumpi n’oluggya lwo kuba akawoowo akavaamu kagoba ensiri. Oyinza okusekula ebikoola byagwo n’oggyamu omubisi n’osiiga omubiri n’ogoba ensiri.
Eddagala ly’okugema omusujja lijja - Minisita
Ekisubi kigoba ensiri.

4. Katunguluccumu: Ono bw’omusekula n’omussa okumpi ne w’osula akawoowo ke kaagobera ddala ensiri ne zitakusemberera.
5. Obutungulu: Obutungulu naddala obubisi bw’obusekula n’obussa okumpi ne w’osula ensiri oba ozigobye.
6. Ekisubi: Kino nakyo kiyamba okugoba ensiri era oyinza okukinyookeza kubanga akawoowo akakivaamu ensiri tezikaagala kale bw’okyesiiga naddala butto akikamulwamu, obeera ozigobye.
7. Kakubansiri: Ono bamunyookeza nga akabaani, buli mukka lwe gunyooka nga ensiri zidduka. Hajji Kitaka Kavulu agamba nti, okuva edda ng’alaba bazadde be banyookeza akakubansiri ng’akabaani buli kiro okugoba ensiri.
8. Rosemary: Akaddo kano osobola okukafumba amazzi agavaamu n’ogamansira mu nnyumba n’ogoba ensiri. Amina Nannyonjo, agamba nti, osobola okufuna butto okuva mu Rosemary n’omumansira mu nnyumba yo n’ogoba ensiri. oba okumwesiiga omubiri gwonna
9. Omujaaja Guno batera kugusimba kumpi n’awaka, kubanga akawoowo kaagwo ng’ogukunyizza kagobera ddala ensiri. Bakamulamu n’amazzi era bw’ogeesiiga ensiri ng’ozeegobyeko
10. Kawunyira naye avaamu akasu akagoba ensiri ssinga omusekula ne weesiiga oba okumukamula amazzi ago agamuvaamu n’ogatta mu bizigo.