Abaluuli bakiise e Mmengo ne baleeta oluwalo olusoba mu bukadde 7

ABANTU b’e Buluuli bakiise e Mmengo n'Oluwalo lwa nsimbi 7,540,000/- ng'akabonero k'okutambulira awamu n'amasaza amalala mu kukulaakulanya Obwakabaka bwabwe.

Hajji Kakomo ng'akwasa Ying. Moses Kulabako eyawaddeyo oluwalo lwa 100,000/-

Bano baakulembeddwa Omwami w'essaza lino, Gerald Kyanjo Kimbugwe ku Lwokuna ne batuusa oluwalo luno e Bulange-Mmengo era bajjidde mu ggombolola zaabwe.

Ku mbuga y'Obwakabaka, baayaniriziddwa minisita omubeezi oweebyobulimi, Hajj Amisi Kakomo ku lwa Katikkiro wa Buganda n'akubiriza abantu ba Buganda okunyiikira okukola ennyo okusobola okukyusa obulamu bwabwe.

Omwami w'e Buluuli Gerald Kyanjo ng'ayogera

Hajji Kakomo yagamba nti okukola obutaweera y'emu ku nsonga ssemasonga ezinazza Buganda ku ntikko era basaanye okukinyiikirira nti mwe bajja okufuna ebyo bye beetaaga mu bulamu obulungi.

Yategeezezza nti essira baliteeka ku ebyo by’erinamu enkizo okuli obulimi naddala emmwaanyi n'amatooke ssaako okulunda by’agambye nti bijja kubaganyula.

Minisita Kakomo era yakubirizza abantu ba Buganda okwekuumira mu bulamu obulungi nga beewala endwadde nga Mukenenya n'endala ezisobola okwewalibwa n'ategeeza nti oluwalo luno lwe baaleeta luyamba okuvujjirira emirimu gy'Obwakabaka okuli ensiisira z'ebyobulamu, okukung’aanya omusaayi n'ebirala ebikwata ku bantu.

Hajji Kakomo ng'ayogera.

Ssaabawolereza wa Buganda, Christopher Bwanika ng'era ye minisita wa Gavumenti ez'ebitundu ategeezezza nga bwe kiri ekirungi okuleetanga abaana mu nteekateeka z'Obwakabaka nga zino, bakule nga bazimanyi.

Omwami w'essaza lino, Gerald Kyanjo abadde n'Abamyuka be Esther Nakyeyune Ssebyala ne John Mary Ssebbale asabye Obwakabaka okubakwatirako ku nsonga ya mazzi, ekibbattaka ate ne nnasale ezinaayamba okusomesa abaana.

Ggombolola nga bwe zaaleese oluwalo;- Mumyuka Kakooge 2,500,000/-,Musaale Wabinyonyi 2,050,000/-,Mutuba 1 Nakitoma 700,000/-, Ssaabawaali Kalungi 1,100,000/-,Ssaabaddu Nabiswera 500,000/-,Mutuba IV Nakasongola 450,000/-,Sabagabo Lwabiyata 240000/-