Ebigezo by'abasawo bitandise leero

MINISITULE y'ebyenjigiriza erangiridde nga bw’egenda okwongera okuvujjirira amatendekero wamu n'ebitongole by'obulamu okulaba nga bongera ku mutindo gw'abasawo abafulumizibwa .

Bino byayogeddwa kamiisona w'amatendekero g'abasawo, Hajjati Safina Museene ku mukolo ekitongole ekivunaanyizibwa ku kubaga wamu n'okugolola ebigezo by'abasawo ki Uganda Health Professions Assessment Board (UHPAB) we kibangulidde abagenda okulondoola wamu n'okukuuma ebigezo by'omwaka 2025 ku Mmande ya wiiki eno .

Hajjati Safina Musene ng'ayogerako eri abazze mu lukung'aana lwa bannamawulire.

Omukolo guno gubadde ku kitebe kya UHPAB e Ntinda era nga gwetabiddwako abagenda okukuuma wamu n'okulondoola ebibuuzo abantu 500.

Ebigezo bino bigenda kuba bya mulundi gwakubiri ekitongole kino gwe bitegese nga bitandika Mmande  nga December 1 okutuuka nga December 12 omwaka guno .

Ebigezo bino bigenda kutuulwa abayizi 99,751 mu bifo ebyakakasibwa 215 . Ku bano abayizi 69,567  basawo n'abazaalisa nga baakutuulira mu bifo 147 ate 30,184 basoma byekuusa ku busawo nga bakutuulira mu bifo 68.

Ssabawandiisi w'ekitongole ki UHPAB Hellen Mukakarisa Kataratambi yeebazizza pulezidenti Museveni olw'obuwagizi obubaweereddwa ng'ayita mu minisitule y'ebyenjigiriza. Mukakarisa asabye abagenda okukuuma ebigezo okufaayo okulaba nga teri muyizi agaanibwa kutuula bigezo lwa butamalayo bisale bya ssomero.

Ye Hajjati Safina Museene abasabye obuteekobana na b'amasomero okwenyigira mu kubba ebigezo olw'okuba amasomero gamanyi okubawaayo okubalabirira nga batuuseeyo  kuba etteeka lya TVET ACT eppya  teririna gwe littira ku liiso ssinga olimenya.