Ababaka bakooye abayimbi okubakunamira ; Baagala gavumenti egambeko!

WALIWO ababaka ba palamenti abalaze okunyolwa ku kye bayise obuseegu obuyitiride mu bayimbi naddala mu ngeri gye bambalamu ssaako enjogera kye baagambye nti kiraga obusiwuufu bw’empisa wamu n’okutyoboola obuwangwa.

Akiikirira Abakadde Mu Palamenti Peggy Wako Ng'ayogera

Bano okubadde omubaka wa Bufumbira East, Nsaba Butuuro, owa Laroo – Pece Division Rev. Fr. Charles Onen wamu n’akiikirira abakadde, Peggy Wako okuvaayo okwogera ku nsonga eno kiddiridde ebyalabiddwa wakati ng’abayimbi Sheebah Karungi ne Cindy Ssanyu battunka ku Lwokutaano lwa wiiki ewedde.

Mu lukung’aana lwa bannawulire lwe batuuzizza ku palamenti baategeezezza engeri abayimbi bombi gye baayolesezzaamu emibiri gyabwe okutuuka okulaba obuwale bwabwe obw’omunda n’amabeere ebyesitaza eri eggwanga nga Uganda eririmu empisa, eddiini wamu n’obuwangwa obusaanye okuweebwa ekitiibwa.

Omubaka Nsaba Butuuro agambye nti kyabadde kyabuswavu nnyo era ayagala minisitule y’ebyobuwangwa eveeyo erambike abayimbi ku ngeri gye bateekeddwa okweyisaamu mu bantu.

Ono era anakuwadde okubanga ebintu nga bino ebyesittaza ate abaana abato batandise okubikoppa nga ate n’abakulu abamu batandise okubikkiririzaamu.

Ye Peggy Wako yagambye nti waliwo ebirungi abayimbi bye bakoledde eggwanga naye nga abamu ennyambala yaabwe esusse ogw’omulamuzi.

Fr. Onen anakuwadde nga munnaddiini okulaba nga ssaakulamentu z’akuze amanyi abantu ze balina okukkiriza kwe kusoma omugigi wamu n’obufumbo wabula nga kati ate abantu bakkiririza mu bwereere bwa bannaabwe.

Bagambye nti abayimbi b’edda nga Jimmy Katumba, Lucky Dube n’abalala baali kyakulabirako kya maanyi nga ye nsonga lwaki n’ennyimba zaabwe zikyayatiikirira n’okutuusa kati okusinga ez’abayimbi b’ennaku zino.