Omugagga Gaster Lule Ntake akoledde abakozi be embaga ey'ekikungo

OMUGAGGA Gaster Lule Ntake akung'aanyiza abakozi be emigogo gya bagole 10 naabakolera embaga y’ekikungo ey’ebyafaayo egasse Kibuli, Nambirembe ne Najjanankumbi ne basalako Nateete, Ndeeba, Busega ne Nalukolongo.

Geoffrey Lutaaya ng'ayimbira omugagga Ntakke ku mbaga y'ekikungo gyeyategekedde abakozi be

Abagole buli mugogo gwasoose mu sinzizo buli omu okusinziira ku nzikirizaye abasiraamu baabwowedde Kibuli, abakulisitaayo mu kkanisa ya Martyrs Church Katwe nga baagatiddwa Bishop Hannington Mutebi ate Abadiventi ne babagattira e Najjanankumbi.

Oluvannyuma bonna baakung'aanye ne basimba mu luseregende lw’emmotoka ez’ebbeeyi kyenkana olwabadde luwezaako mayiro namba mwe baasseeyeeyedde okutuuka e Nalukolongo mu luggya lwa fakitole ya Ntake webaasembereza abagenyi baabwe wasbula gye baayise yonna ng’abantu baleka abasamadde.

usumba Bugembe ng'asala omuziki n'omugagga Ntakke

Ku mukolo buli mugogo gwabadde guweereddwa ekifo kyagwo ekiyooyote (gazable) era buli mugogo nga gwategekedwa ne keeki yaagwo eyamaddala ey’okusala nga zino zaabadde zisimbiddwa mu layini era okuzisala olwatuuse bonna ne balagirwa bayimirire ku keeki zabwe ze baasaze omundi gumu awo ne balyoka b’enyweesa n’okweriisa wakati mu kweraga amapenzi.

Omukolo gwabadde gwa kitiibwa nnyo nga gwetabidwako ab’ebitiibwa okwabadde minisita w’eMmengo ow’ebyobulimi Hajji Amis Kakomo, omuwandiisi w’enkalakkalira mu minisitule ya gender Agley Kibenge, ‘akulira mother’s union mu Buganda Josephine Kasaato n’abalala.

Abagole nga basagambiza oluvannyuma lw'okugattibwa mu mbaga ey'ekikungo

Abayimbi okwabadde pasita Wilson Bugembe, Sheebah Karungi eyeesaze ka siriiti akaasiliiti lubalala, David Lutalo, Geoffrey Lutaaya okwo gattako Mbaziira Tonney baasanyusiza abagole n’abagenyi ne batema ddansi.

Dr. Canon, Gaster Lule Ntake n’omukyala Edith Ntale nabo baaccamudde abantu bwe beeraze amapenzi mu ngeri y’okwejjukanya nga bano baazinye akayimba akakade bombi nga bwe beekuteko oluvannyuma ne basala ne keeki.

Abagole nga basala omuziki oluvannyuma lw'okugattibwa

Wadde embaga kwabadde abagole ab’enzikiriza y’obusiraamu n’Abadiventi abatakiririza mu mwenge naye gwo gwabaddeyo mu bungi era abaabadde ku mukolo baagunywenne ne batandiika n’okuyimirira ttengerere.