Vision Group ewaddeyo obukadde 600 okutegeka embaga ya Kyabazinga

Bya Lawrence Kizito                                                                      

KKAMPUNI ya Vision Group efulumya olupapula lwa Bukedde ekutte mu nsawo n’eggyamu obukadde 600, ziyambeko mu kutegeka embaga ya Kyabazinga Wilberforce Gabula Nadiope IV, ne Inebantu Jovia Mutesi.

Omukolo ogw’okuwaayo ssente zino gubadde ku kitebe kya Vision Group ekisangibwa e Lugogo, olwaleero ku Lwokusatu nga November 8, 2023.

Ssente zino ziweereddwaayo akulira Vision Group, Don Innocent Wanyama, nga azikwasizza amyuka Katuukiro wa Busoga Alhaji Osman Ahmed Noor.

Embaga ya Kyabazinga yaakubeerawo nga November 18,2023 mu Kanisa ya Christ's Cathedral e Bugembe mu kibuga Jinja.

Olive Birungi Lumonya Ng'assa Omukono Ku Kifaananyi Ky'embaga Ya Kyabazinga. Ku Ddyo Ye Don Wanyama N'amyuka Katukiro Alhaji Osman Ahmed

Wanyama agambye nti enkolagana ya Vision Group n’Obwakyabazinga nywevu nnyo ate emaze ebbanga ddene, era embaga eno ne bwenaaba ewedde, baakusigala nga bakolagana bulungi.

Yeeyamye nti Vision Group egenda kuyambako Inebantu ng' atandise emirimu gye egy’okukunga n’okukulaakulanya abantu, okulaba nga gitambula bulungi, kw'ossa okutumbula pulojekiti z’Obwakyabazinga endala.

Ssente zino Wanyama agambye nti zigenda kuweebwayo okuyita mu birango ku mikutu gya Vision Group gyonna era n’omukolo gw’embaga gwakulagibwa butereevu ku ttivvi za Vision Group, abataasobole kubeera ku mbaga kibayambe okugoberera ebigenda mu maaso.

Vision Group era y'egenda okukuba akatabo ak’enjawulo ak’embaga eno, era Wanyama agambye nti omulimu gugenda kubeera muyonjo olw’ebyuma eby’omulembe ebikuba ebitabo, n’abawandiisi abalungi.

Ye Alhaji Osman Ahmed, yeebazizza Vision Group olw’okudduukirira omulanga gw’okusondera embaga ya Kyabazinga, n’asaba enkolagana eno egende mu maaso ku lw’obulungi bw’eggwanga.

Omumyuka wa Katuukiro, Osman Ahmed yawerekeddwaako abakungu abalala abali ku kakiiko akateekateeka embaga okuli Olive Birungi Lumonya, Minisita w’ebyobulambuzi e Busoga Hellen Namutamba, Dan Alinange, eyakiikiridde Minisita wa guno na guli mu ofiisi ya Katikkiro wa Uganda Justine Kasule Lumumba.