'Abakozi abamu batigiinya abaana abalenzi nga baagala okubakozesa eby’obuseegu'

Hadijah Kinaabi, owaabakyala w’e Busega: Waliwo omukozi eyazze n’andoopera mukamaawe nti, amuyisa bubi, amwozesa obuwale bwe obw’omunda.

Nnayise omukyala okuttaanya ensonga ze n’omukozi, kyokka ne nkizuula nti, omukozi alimba, kuba twamubuuzizza langi z’obuwale obwogerwako nga nazo tazimanyi.

Abakozi abo bwe batandika okufuna emikwano gibayinula, ne babeera bazibu, basobola okuwaayiriza, batulugunya abaana nga babatwala ku masomero n’awaka nga basigaddewo nabo.

Bwe bamunenyako akatono ku nsobi gy’abeera akoze ate nga ntuufu anyiiga, olwo obusungu n’abuteeka ku mwana kuba omukulu abeera tamusobola.

Abamu bwe babalekera amata okuwa abato ate bbo be baganywa, abaana ne babawaamu caayi omukalu.

Abakozi abamu batigirira abaana abalenzi nga baagala okubakozesa eby’obuseegu, babba abaana. Oluusi mbeera mu kulawuna ekitundu ne mbasanga nga baliko bye bakola ebitanyuma.

Bagaba ebintu by’awaka eri baliraanwa ku bwereere, babeera n’obusungu bungi ku bakama baabwe ne weebuuza gye babuggya. Balabika bajja okukola nga beekyaye, n’aleeta omutima ogwo omubi gy’azze okukola.

Ntera okubatuuza ne mbabuulirira n’okubabuuza ekibakozesa ebintu ebikyamu eri bakama baabwe n’abaana be balabirira, naye nga tebalina kyakuddamu, omubuuza lwaki otulugunya omwana oyo ng’addamu nti, tewali.

N’olaba ng’alina omutima omukyamu, ne weebuuza oba kiki. Abaana bangi abayise mu mikono gy’abakozi batulugunyiziddwa abakozi, babakonkona emitwe, babasuna n’okubateekako obusungu obuyitiridde.