Otafiire asabye Ochola okukwasisa empisa mu baserikale

MINISITA w’ensonga z’omunda mu ggwanga, Maj. Gen. Kahinda Otafiire alagidde omuduumizi wa poliisi, Martins Okoth Ochola okukwasisa empisa abaserikale naddala ab’amadaala aga wansi b’agamba nti basusse eggume n’obutawuliriza bakama baabwe.

Bwe yabadde aggulawo ttabamiruka w’olukiiko olusalawo ensonga mu poliisi (Police Council) olw’omulindi ogwa 27 olwatudde e Naggulu, Otafiire yagambye
nti abaserikale abali ku ddaala lya Assistant Superitendant of Police (ASP) okukka wansi basusse okusiiwuuka empisa n’obutawuliriza ababali waggulu nga kyetaagisa okubakwasisa empisa n’okuddamu okubabangula nga babatendeka.

Yagambye nti okusobola okukwata ku baserikale abasiiwuuse empisa, poliisi erina okuggulawo ofiisi ezikwasisa abaserikale empisa n’okubanoonyerezaako eza Professional Standards Unit ( PSU) kiyambe okubakangavvula.

Omuduumizi wa poliisi mu ggwanga, Okoth Ochola yagambye nti mu kiseera kino poliisi eri mu kuteeka mu nkola ekiragiro kya Pulezidenti okuteeka poliisi mu magombolola n’okukozesa tekinologiya.