Kyabazinga n’owa Nigeria beeyamye okutumbula talanta

KYABAZINGA wa Busoga William Gabula Nadiope IV  asisinkanye omukulembeze  w’ennono ow’obwakabaka bwa Warri mu Nigeria, Ogiame Atuwatse III ne bateesa ku nkukulaakulana y’ebitundu byabwe bombi.
Ensisinkano yabadde Ntebe mu disitulikiti y’e Wakiso ng’ezimu ku nsonga Kyabazinga ne Olu Atuwatse III ze baateesezzaako mu mboozi ey’akafubo mwabadde okutumbula talanta z’abavubuka omuli okuzannya ffirimu, okutumbula ebyobulambuzi n’ebyobuwangwa. Kyabazinga ne Atuwatse lll, beeyamye okwongera okugumya enkolagana yaabwe kyongere okutumbula enkulaakulana y’abantu baabwe n’obumu.
Atuwatse III yasiimye Kyabazinga olw’okukulembera abantu b’e Busoga obulungi
n’amuyozaayoza okufuna Inhebantu Jovia Mutesi.
Yasabye Kyabazinga William Gabula Nadiope IV amukyalireko mu bwakabaka bwe obwa Warri mu Nigeria omwaka ogujja. Mmeeya w’ekibuga ky’e Ntebe, Fabrice Rulinda ye yakyazizzaKyabazinga ne Atuwatse III mu kibuga kye. Kyabazinga yawerekeddwaako minisita omubeezi ow’ebyensimbi mu Busoga, Ivan Kiirya awamu ne Kamisonaavunaanyizibwa ku nzirukanya y’ebibuga mu minisitule ya gavumenti ez’ebitundu Charles Magumba.
Olu wa Warri mu Nigeria, Atuwatse III yawerekeddwaako mukyala we n’abantu abalala 30. Okusinziira ku kamisona Magumba, Atuwatse III yasoose kulambula kifo eky’obulambuuzi ekya Source of the Nile mu kibuga Jinja n’ayolekera e Ntebe gye yasisinkanidde Kyabazinga.
Magumba yategeezezza nti Atuwatse III yayitibwa okujja okwetaba ku mukolo ogw’embaga ya Kyabazinga William Gabula Nadiope IV ne Inhebantu Jovia Mutesi eyaliwo nga November 18, 2023 mu Lutikko e Bugembe wabula teyasobola kubaawo.
Magumba yayongeddeko nti Atuwatse III n’abantu be yatambudde nabo era bazze mu
 Uganda okusisinkana omumyuka wa Sipiika wa Palamenti, Thomas Tayebwa ne mmeeya wa Munisipaali ye Ntebe, Fabrice Rulinda. Magumba yategeezezza nti Olu of Warri kitegeeza kabaka w’amazzi era nti obwakabaka bwa Warri bwe bumu ku bwakabaka obugagga mu Nigeria