Omuvubuka alumiriza omujaasi okumukuba amasasi mu kugulu ayagala bwenkanya!

OMUJAASI avudde mu mbeera, n'akuba omuvubuka amasasi agamulumizza, ng'amulumiriza okuyingira mu kikomera kye n'ejjambiya okugezaako okumubba.

Bibadde ku kivule mu zzooni ya Kikajjo  mu ggombolola y'e Masajja mu Wakiso , omutuuze era nga mujaasi ategeerekese nga Kasimu , bw'akubye omuvubuka Haruna Mutagubya amasasi n'atwalibwa mu ddwaaliro okufuna obujjanjabi.

Wano Mutagubye ng'ali mu ddwaaliro.

Mutagubya, nga naye mutuuze w'e Masajja, amasasi , gamukwasizza mu kugulu okwa ddyo ,era nga mu kiseera kino , ali mu bulumi bw'amaanyi.

Kigambibwa nti Mutagubya , yasangiddwa munda mu kikomera kya Kasimu n'ejjambiya nti kyokka bwe yagezezzaako okumuyimiriza n'adduka, era wano kwe kumukuba amasasi agaamulumizza.

Omwogezi wa poliisi mu Kampala, Patrick Onyango, ategeezezza nti, Haruna baasobodde okumuyimbulira ku kakalu ka poliisi okugira ng'afuna obujjanjabi , nti n'oluvannyuma ne bamuyita okuggyibwako ebinkumu nti naye ng'akyagaanyi . Okubuuliriza kugenda mu maaso.

Mutagubya mu kwogerako ne Bukedde Fa Ma Embuutikizi,  agambye nti Kasimu , yamukubidde bwereere amasasi nti kuba yabadde kumpi n'ekikomera ng'aliko gw'ayogera naye ku ssimu ekiro, nti kwe kumukuba emiggo n'oluvannyuma n'amukuba amasasi mu kugulu ne gayita mu ggumba ng'amuyita omubbi.

Agasseeko nti baamusabye ssente nyingi okumulongoosa okugulu, mu kiseera kino, z'atalinaawo era n'asaba poliisi okukangavvula omusajja oyo, afune obwenkanya.