Bannamawulire balamaze e Namugongo ku lw'omuyima waabwe Achilles Kiwanuka omuto.

Bannamawulire ba kkampuni ya Vision Group bakulembeddemu bannamawulire abalala okulamaga e Namugongo.

Wanyama ng'akutte ekibbo ky'ebirabo ku Klezia e Namugongo

Bano nga bakulembeddwamu bandi baasimbudde ku kitebe kya Vision Group mu industrial area mu Kampala nga bali wamu ne bannamawulire b’ebitongole bya mawulire abalala ne batambula okutuuka ku basirika e Namugongo gye beetabidde mu kusaba kw’okwefumiitiriza ku muyima w’abannamawulire Achiles Kiwanuka Omuto.

 Okusaba kwakulembeddwamu viika w’essaza ekkulu erya Kampala Msg. Rogers Kabuye, yatenderezza omulimu ogukolebwa bannamawulire ogw’okubunyisa okumanya mu bantu.

Don Wannyama ng'akulembeddemu abakozi ba Vision Group ne bannamawulire abalala okwolekera Namugongo eggulo

Kyokka ono yawabudde bannamawulire nti balabire ku bajjulizi ba Uganda nga bakola emirimu gyabwe nabo bakulembeze nga okuwa abantu amawulire agabazzaamu essuubi.

Ono era yavumiridde enkozesa embi ey’emitimbagano okususse okusaasaanira amawulire ag’obulimba n’okusasamaza n’asaba ababadde bagafulumya okwefumiitiriza bakikomye.

Wanyama ng'asembera ku mmeeza entukuvu.

Omulamazi omukulu yabadde akulira Vision Group Don Wanyama, ono yasiimye olukiiko oluteesiteesi bulijjo okuwanga bannamawulire ekyanya ky’olunaku luno ne balamaga era ne babawa mmisa eno ey’enjawulo ku lw’omuyima waabwe.

Yakuutidde bannamawulire bulijjo okukola emirimu gyabwe nga bakozesa obumanyirivu bwe balina okusobola okukuuma ekitiibwa ky’omulimu gwabwe.

Abakozi nga boolekera ekiggwa ky'Abajulizi e Namugongo.

Bannamawulire ab’emikutu egy’enjawulo okwabadde Josephat Sseguya owa Bukedde, Cissy Birungi owa Bukedde, Achillies Kamulegeya owa CBS n’abalala baasabidde omulimu gwa bannamawulire ne bawanjagira abajulizi bayambe bannamawulire okubalongoseza mu mbeera gye bakoleramu.