Owa North Korea emmeeri bw’egaanyi n’asabuukulula emmundu

PULEZIDENTI wa North Korea aleese pulaani okumenyawo obuswavu obwamutuusiddwaako bwe yagenze okutongoza emmeeri ey’omutawaana mu kulwana n’ekwama.

Aleese mizayiro enkambwe gy’agenda okugezesa yeggyeko ekikwa ky’Abazungu abaamusekeredde. Kim Jong Un, yalambudde mizayiro ekika kya KN-25 Long Range Artillery ezikuba ewala n’alaalika yenna anaagezaako okutabangula okugezesebwa kwayo nga bwe baakola ku by’emmeeri, nti naye awedde.

Owa North Korea emmeeri bw’egaanyi n’asabuukulula emmundu

Mizayiro eno egwa mu kiti kya mizayiro z’eggwanga eryo ezimanyiddwa nga Hwasongpho-11-Ka tactical ballistic missile. Okusinziira ku mawulire ga North Korea aga Korean Central News Agency (KCNA), ekika kya mizayiro ezo ezaasooka, zaagezesebwa gye buvuddeko wabula Kim gye yalambudde, ya tabbu nnyo okusinga ziri.

EKUBA TAGETI EMPIME OBULUNGI
Kim agamba nti mizayiro eyo esobola bulungi okwetikka bbomu za nukiriya. Ekoleddwa ng’edduka n’ekuba tageti eri mu buwanvu bwa kiromita 800, ze mayiro 497. Eggwanga lye lirina bbomu za nukiriya.

Obuwanvu mizayiro empya gy’ekuba, bakafulu mu by’entalo baakirabye nti, yagikoze kwetegekera South Korea bwe batalima kambugu.

Esobola okukuba ekibuga Seoul ekya South Korea era yalaajanye dda. Mizayiro eno Kim, ategeka kugigezesa ssaawa yonna ng’egenda kubuusibwa ng’agitunuzza ku liyanja lya Sea of Japan. Japan nayo kennyini Kim takolagana nayo kubanga yo ne South Korea, zikolagana ne America.

Obunkenke kati buli mu magye g’eggwanga lye ne bakakensa abaaweesezza mizayiro eyo nga batya okuttibwa singa eneegaana okubuuka obulungi etuuke ne ku tageti eyagipimiddwa. Obunkenke buvudde ku byabaddewo gye buvuddeko, Kim bwe yagenze okutongoza emmeeri ey’amaanyi egwa mu kiti kya Destroyers n’eremera mu kifo.

Yasooka kwewaanira ku Bazungu nti, ku luno bawedde, k’akoze emmeeri ey’akabenje ekyaddiridde kumusekerera. Mu busungu, Kim yakutte abakungu abaabadde bavunaanyizibwa n’abaggalira oluvannyuma amawulire ne gafuluma nti, battiddwa.

Abaakwatiddwa ku by’emmeeri kwabaddeko;
l Eyakulira eby’okugizimba.

l Akulira omwalo gwa Chongjin shipyard gye baagizimbira.

l Omumyuka w’akulira eby’entambula y’emirimu ku mwalo ogwo.

l Omulala eyasembyeyo okukwatibwa yabadde Ri Hyong Son, amyuka akulira ekitongole ekiyitibwa Munitions Industry Department of the Party Central Committee.