Aba sister be Nkokonjeru bakubye ebiragaano

Abasista b’ekibiina kya Little Sisters of St. Francis ab’amanyiddwa ennyo nga Abasista b’e Nkokonjeru bali mu ssanyu n’akujaganya oluvannyuma lw’abannaabwe 12 okukuba ebiragaano eby’olubeerera ebibafuula bannakibiina kino obulamu bwabwe bwonna.

Aba Sister nga bayimba oluvannyuma lw'okkuba ebirayiro

Omukolo gwabadde ku Nnyumba Nakazadde ey’Abasista bano e Nkokonjeru, mu distulikiti y’e Buikwe ku Lwomukaaga. Gw’atandise n’ekitambiro kya mmisa eyakulembeddwa Omwepiskoopi w’essaza ly’e Lugazi, Christopher Kakooza. Y’atambidde n’Omwepiskoopi w’e Jinja, Charles Martin Wamika, Omwepiskoopi Omuwummuze Matia Ssekamaanya, Viika- Genero w’e Lugazi Dr. Richard Kayondo, n’Abasaserdooti bangi abaavude mumasaza ga Klezia Katolika ag’enjawulo.

Abaakubye ebiragaano eby’olubeerera kwabaddeko Sr. Mary Teddy Nakitto ava mu kigo ky’e Bukoto mu ssaza ly’e Masaka, Sr. Mary Scholastica Busuulwa ava e Nakibano mu ssaza ly’e Lugazi, Sr.  Mary Happy Filder ava mu ssaza ekkulu ery’e Gulu, Sr. Mary Victor Akong ava mu ssaza ly’e Soroti ne Sr. Mary Alivera Kyohairwe ava mu ssaza ekkulu ery’e Mbarara.

Abalala ye Sr. Mary Oliver Terubulwa ava mu kigo ky’e Wakiso mu ssaaza ekkulu ery’e Kampala, Sr. Mary Assumpta Aleso ava e Soroti, Sr. Mary Clovia Nambogga ava e Malongwe mu ssaza ly’e Lugazi, Sr. Maria Alapo (Soroti), Sr. Mary Lydia Namaganda ava e Wakiso, Sr. Mary Godlive Atubo ava e Soroti, ne Sr. Maria Goretti Namugenyi ava e Matale mu ssaza ly’e Masaka.

Aba sister oluvannyuma lw'okkuba ebiragaano

Bano baasose kusaba Nankulu w’ekibiina kino, Mother Rita Christine Nakitende abakkirize okukuba ebiragaano, era bweyabakkiriza nebeeyama okubeera mukibiina kino obulamu bwabwe bwonna ngabagoberera amateeka g’ekibiina kino. Baamulagaanyizza okusigala mu mbeera ey’obwavu, obutukuvu n’obuwulize.

Oluvannyuma Omusumba Kakooza y’abanaanise empeta, era n’abambaza engule ey’amaggwa, akabonero akalaga nti bafuuzse bagole ba Yezu. Yabamansiddeko amazzi ag’omukisa era n’abanyokeza akabaani okubatukuza, Bano oluvannyuma batadde omukuno kubiwandiiko okukakasa obweyamo bwabwe.

Kumukono guno gwegumu, Abasista okwabadde Sr. Ann Grace Acakara Kizito ava e Soroti, Sr. Mary Mbaaga Tuzinde Nantume ava e Hoima, ne Sr. Mary Justine Nababi  ava e Buloba mu ssaza ekkulu ery’e Kampala baajaguzza emyaka 25 mu Bunnaddiini.

Sista Rose-Mary Gaudensia Nakona ava mu kigo ky’e Kijaguzo  mussaza ly’e Kasana-Luweero y’ajaguzza emyaka 50 mu Bunnaddiini ate ye Sr. Rosemary Nannozi ava e Mukono n’ajaguza 60. Omusista Rosemary Luyiga ava  mu kigo ky’e Naggalama y’ajaguzza emyaka 75 mu Bunnaddiini.

Bano bonna Nankulu y’abayozaayozezza nnyo olw’obumalirivu n’okwewayo kwebalaze ebbanga lyonna lyebamaze mukibiina kino. Abepiskoopi (Christopher Kakooza, Matia Ssekamaanya ne Charles Wamika), nabo baakulisizza abajaguza, nebeebaza nnebazade baabwe, n’abo bonna abaabawaniridde mu mbeerea ey’Obunnaddiini.