Eyazadde abaana 4 omulundi gumu asannyalazza entambula n'obugombe

OMUSAJJA apangisizza oluseregende lwa mmotoka bw’abadde anona mukyala we eyakubyewo ezzadde ery’abaana 4 omulundi gumu.

Abamu Ku Booluganda Ly'omukazi N'omusajja Nga Basitudde Abaana Abaazaaliddwa Omulundi Ogumu.

Patrick Wadimba, 39, y’apangisizza emmotoka ezisobye mu ttaano n’azitimba nga ez’abagole n’anona kabiite we Ronnet Konshaba, mu ddwaaliro e Kawempe mu Kampala gye yazaalidde.

Bakira emmotoka zitambula kasoobo nga bwe zikuba obugombe ekireeseewo akalippagano k’ebidduka ku luguudo oluva e Kampala okudda e Gulu. Abafumbo bano batuuze ku kyalo Kigoogwa mu ggombolola y’e Gombe mu Kawempe Divison.

Mmotoka Bwe Zaalabise Ku Luguudo Nga Bayisa Ebivvulu.

Wadimba yategeezezza nti kabiite we olwazadde n’ategeeza mikwano gye ku kyalo, abaamuwadde amagezi okukolawo eky’enjawulo okusiima maama w’abaana.

Olwamusiibudde eggulo ku Lwokusatu, kwe kupangisa emmotoka ze baatimbye ne bategeka n’akabaga awaka.

Ssekawere Wadimba ng'essanyu libula okumutta.

Konshaba yeebazizza Katonda olwa bba okumwagala n'okumulabirira okuva bwe yafuna olubuto. Ate Wadimba yagambye nti kino mukazi we ky’akoze agenda kumusasula na kumukuba mpeta essaawa yonna.

Yagambye baamuzaala omu mu kika  era abaddenga asaba Katonda amuwe abalongo, kyokka laba bw’amuwaddemu bana! 

Yeebazizza abasawo b’e Kawempe abaalabiridde mukyala we okuva bwe yategeera nti alina abaana bana.

Ezzaddw Ly'abaana Be Baafunye.

Awaka, Wadimba yategeseewo okusaba kw’okwebaza okwakulembeddwa omubuulirizi w’ekkanisa ya St. Stephen Kigoogwa abafumbo bano gye basabira. 

Omubuulizi Robinah Musisi, yasabye abaami obutasuulirira buvunaanyizibwa bwabwe nga bazadde abaana bwe bati.

Konsaba Bwe Yabadde Afaanana.

Yeebazizza Wadimba olw’omukwano gw’alaze mukyala we. Abafumbo bano babadde n’abaana babiri. 

Wadimba alina edduuka ly’ebizimbisibwa e Kigoogwa, wabula nga yasooka kuvuga bodaboda. Baamaze emyaka mukaaga nga babeera bombi.