Nnamukadde ow'emyaka 67 avunaaniddwa emisango 32 egy’okusomba abaana n’abaleeta ku nguudo okusabiriza

Bya Margret Zalwango

Haruna Ngobi amanyiddwa nga Mzei 67 omutuuze w'e Katwe 11 Base zooni yasimbiddwa mu kkooti n'avunaanibwa emisango 32 egy'okuleeta abaana ne bazadde baabwe okusabiriza ku nguudo mu Kampala.

Ngobi avunaaniddwa wamu ne Godwin Matovu amanyiddwa nga Musawo 24, nga muyizi , Aisha Nasiwa 42 ne Joseph Tamale 29 nga bonna batuuze mu Base Zooni e Katwe mu munisipaali y'e Makindye.

Bonna wamu baasimbiddwa mu maaso g'omulamuzi Igga Adiru owa kkooti y'eddaala erisooka e Makindye n'abasomera emisango era bonna ne bagyegaana.

Abawawaabirwa kigambibwa nti January 2023, baaleeta, baafuna era ne bakuuma abaana n'ekigendererwa eky'okubafunamu ssente.

Kino kikontana ne ssemateeka alwanyisa okukusa abaana ennyingo 3(1) (a) ne 5 (a).

Omulamuzi Adiru teyabakkirizza kubaako  kye boogera kubanga emisango egibavunaanibwa gya nnaggomola kkooti ye terina buyinza kugiwozesa.

Omuwaabi wa gavumenti, Hope Rukundo yategeezezza kkooti nti okunoonyereza kukyagenda mu maaso 'nasaba batwalibwe mu kkomera nga bwe bakola okunoonyereza.

Abaana abaaleetebwa bali wakati wemyaka 11 ne 17 era baakwatibwa mu bikwekweto ebyakolebwa poliisi ekiro ng'etangira abaana bano okubeera ku nguudo nga Uganda ekyazizza abagenyi b'olukungaana lwa NAM ssaako olwa G77+ China.

Emisango emirala egyabavunaaniddwa kuliko: okuwaayo ennyumba ne basuzaamu abaana bano nga bakimanyi baaleetebwa mu bumenyi bwamateeka era emirimu gye bakola gimenya mateeka.

Baasindikiddwa mu kkomera okutuusa nga February 12,2024 okuwulira okunoonyereza wekunaaba kutuuse.