Embeera ya Ssegirinya etandise okuwa essuubi

Bya Hannington Nkalubo

EMBEERA y’omubaka Mohammad Ssegirinya etandise okuwa essuubi bw’aggyiddwa mu kasenge k’abayi mu ddwaaliro lya Aga Khan e Ke­nya n’assibwa mu kifo abafamire ne mikwano gye we basobola okumulabira.

Ssegirinya (Kawempe North) amaze wiiki nnamba ng’ali mu kasenge k’abayi era ng’ayambibwako byuma okussa. Abasawo babadde tebakkiriza bantu kumulaba olw’embeera embi gy’abaddemu ng’obulwadde bumuluma.

Omubaka omukazi owa Kam­pala, Shamim Malende y’omu ku baasoose okutuuka ku Ssegirinya nga yaakava mu ICU era yategee­zezza nti embeera ye tennaba kuba nnungi nnyo naye ewa essuubi.

Justine Nakajumba, maama wa Ssegirinya, yategeezezza nti embeera ya mutabani we ekya­yungula ezziga kubanga akkozze nnyo, mupeeruufu yenna era alina obulumi kyokka akyali mugumu nti mutabani we ajja kumegga ekirwadde kino.

Ssegirinya obulwadde bumaze ebbanga nga bumuluma. Bwam­weyongera bwe yali mu kkomera ne bamutwala mu ddwaaliro ate ne bwe yavaayo era ne bugenda mu maaso nga bumuluma.

Olumu yagenda ku KCCA okwe­taba mu lukiiko kyokka banne ne bamwewuunya ku ngeri obul­wadde gye bwali bumulumye en­nyo era ne bamuwabula okugenda amangu mu ddwaaliro abasawo bongere okumuyamba.

Yatwalibwa mu ddwaaliro e Ns­ambya abasawo gye baamukeber­era ne bazuula ng’atawaanyizibwa obulwadde obwakwata ebitundu bye eby’omunda era nga yeetaaga kutwalibwa bweru wa ggwanga.

Guno mulundi gwakubiri ng’atwalibwa ebweru w’eggwanga okumujjanjaba.