Enkolagana ya Kenzo n’omubaka ebuzaabuza

Bya Basasi Baffe

ENKOLAGANA y’omuyimbi Eddy Kenzo Musuuza n’omuba­ka omuto, omubalagavu atiba ng’ennyana, Phiona Nyamutooro ebuzaabuza.

Omubaka ono nga y’akiikirira abavubuka mu Palamenti, bw’ay­ogera osigala okyayagala era n’endabika ye erya ppate era ye kennyini aba ng’ekyokulya.

Omubaka ono era yaakakubawo eddenzi. Kwe kugamba w’osomera bino ng’awunya mata.

Kenzo bwe yabadde ayogera ne munnamawulire wa CNN, Larry Madowo ku pulogulaamu ya African Voices - Change makers, yagambye nti musajja mufumbo era alina abaana.

Alina omwana omuwala, Aamal Musuuza, gwe yazaala mu Rema Namakula eyali mukyala we ne baawukana mu 2019 ne yeefunira (Rema) Hamza Ssebunnya, gwe yayanjula ku mukolo ogwayuu­guumya eggwanga.

Alina n’omulala Maya Musuuza gwe yasooka okuzaala mu mukya­la gwe yasooka okusisinkana.

Nyamutooro ava mu bitundu by’e Nebbi kyokka bazadde be balina amaka e Bugema mu Lu­weero okuliraana yunivasite.

Bwe yali ayogera ne ttivvi ya Galaxy gye buvuddeko, Nyamu­tooro yeegaana eby’okubeera n’enkolagana ey’enjawulo ne Kenzo kyokka yagamba nti yali aludde ng’amumanyi ne bwe yali (Nyamutooro) tannafuuka mubaka.

Baliraanwa ba bazadde b’omubaka Nyamutooro baate­geezezza Bukedde nti, e Bugema waabaddewo omukolo abatuuze gwe baagambye nti gwabadde gwefaanaanyiriza ogw’okukyala kyokka tebaategedde kukyala kw’ani okwo okwabaddeko abantu abatono ddala nga n’okusinga baamunny­umba.

Kenzo bwe yatuukirid­dwa ku nkolagana ye n’omubaka Nyamu­tooro yagambye nti, “Ebyo bye muhhamba sibimanyi.”

Ye Nyamutooro yabad­de takwata masimu ge kyokka mu Palamen­ti baategeezezza nti ali mu lu­wummula