Nnamwandu alumirizza balamu be okumubbira emmere n'okwagala okwezza amaka ga bba

Nnamwandu alumirizza balamu be okumutulugunya nga bamubbira emmere ye n’okumugobaganya mu maka bagezze.

Mulamu we eyaweebwa obuyinza okuddukanya ebintu by’omugenzi (Administrator) amwanukudde nti ekibanja tekyali kya ntuuyo za bba wabula kyali kya kitaabwe era nga kya baana bonna.

Nnamwandu Lunkuse Bw'afaanana.

Bino byabadde ku kyalo Namabugga mu ggombolola y’e Kitimbwa mu maka g’omugenzi Dan Lwanga eyali “cashier” ku disitulikiti y’e Kayunga eyafa mu mwaka gwa 2020.

Nnamwandu Esther Lunkuse agamba nti yamala mu bufumbo ne bba Lwanga emyaka 18 wabula okuva lwe yava mu nsi abaffamire ya bba baamufuukira ekyambika.

Lunkuse alumirizza ba ‘Administrator’ abaakulembeddwa David Ssentamu okukajjala mu maka g’omugenzi nga bayingira ppaka mu kisenge ky’omugenzi olw’ebigendererwa byabwe.

Collins Kafeero Ng'annyonnyola Mu Lukiiko.

Bano bamulumirizza okuteeka eby’awongo mu nnyumba ne ku malaalo g’omugenzi. Lunkuse embeera yamuyitiridde ne yeekubira enduulu ku disitulikiti omugenzi gye yali akolera era Collins Kafeero ow’amaka n’eddembe ly’obuntu n’agendayo n’atuuza olukiiko nga lwetabiddwamu Brian Agaba owa poliisi n’omuntu wa bulijjo e Kayunga wamu n’akulira eggombolola, abaakuliddwa ssentebe Ntalo Maling’a.

Wabula, omu ku bamulamu nga ye Ssentamu yagambye nti mukulu we yaleka bannamwandu bana era nga bonna beetaaga obuyambi era nti omukyala oyo Lunkuse mutabuzi kubanga bba okufa yalwalira ebbanga lya myaka egisoba mu ebiri kyokka bwe baali mu kuziika yawayiriza omu ku baffamire gwe bayita Ssebadduka nti yeyasse bba.

Ssentamu yagambye nti bamulamu balumirizza okuwaganyaza abaana nga tebalina mpisa n’akatono.

Amaka G'omugenzi Bwe Gafaanana G'alumiriza Abalamu Okwagala Okutwala.

Kafeero alabudde abaffamire obutayingira nnamwandu era bwe wabeerawo amwegwanyiza amwogereze mu mirembe era amutwale mu maka ge gy’aba amuwasiza so si kulinnyirira maka ga mugenzi ng’ebintu babikola mu ngeri ya ffujjo.

Ku by’okutema emmere, era abalabudde bakomye okulinnyirira ennimiro ya nnamwandu era bwe wabaawo ekitundibwa kyonna bateekeddwa kukiyisa mu lukiiko. Awabudde nnamwandu akomye okuwaganyaza abaana batuuke n’obutawulira bataata baabwe abaasigalawo.