Amawulire
Bishop Kaziimba Mugalu alangiridde okusimba emiti akakadde kalamba okutaasa obutonde bw'ensi
EKKANISA ya Uganda erangiridde Entekateeka yaayo ez'okusimba emiti Akakadde kalamba nga omu ku kawefube w'okuzzawo obutonde bw'Ensi obutaguddwataaguddwa olw'ebibira okusaanyizibwawo.
Kaziimba Mugalu ng'ayogera
By: James Magala, Journalists @New Vision
EKKANISA ya Uganda erangiridde Entekateeka yaayo ez'okusimba emiti Akakadde kalamba nga omu ku kawefube w'okuzzawo obutonde bw'Ensi obutaguddwataaguddwa olw'ebibira okusaanyizibwawo.
Entekateeka eno ey'okusimbe emiti yalangiriddwa Ssabalabirizi w'e Kkanisa ya Uganda Dr.Samuel Kazimba Mugalu,bw'abadde atongoza Wiiki y'Okutaasa Obutonde bw'Ensi mu Kkanisa mu Maka ge e Namirembe.
Ssabalabirizi Kazimba Mugalu,ategeezza nti nga Ekkanisa,baakusimba emiti Akakadde kalamba ku Ttaka ly'e Kkanisa mu bitundu by'e Ggwanga eby'enjawulo era n'alagira Abakristaayo okutandika okusimba emiti ku mikolo gy'Ekkanisa gyonna omuli;Okubatiza,Embaga n'enkungaana z'enjiri eziva zitegekeddwa.
Wabula Ssabalabirizi Kazimba atabukidde abanene mu gavumenti beyagambye nti besomye okusaanyawo Entobazi mu bitundu by'e Ggwanga eby'enjawulo nga bazizimbamu amayumba ekintu ekiteeka e Ggwanga mu katyabaga.
Kazimba asekeredde abazimba mu Ntobazi n'abajjukiza nti wadde balina Ssente nti kyokka ekiseera kijja kutuuka amataba gabagobeyo n'asaba gavumenti okuvaayo n'amaanyi ku nsonga y'okutaasa obutonde bw'Ensi.
Wano Dr.Kazimba,asabye Bannaddiini mu nzikiriza zonna okuvaayo okukulemberamu olutabaalo lw'okubunyisa Enjiri ku kutaasa Obutonde bw'Ensi embeera okusobola okudda mu Nteeko.