Ssente zitabudde aba ttakisi ku siteegi ya Kyengera

ABAKULEMBEZE n’abavuzi ba ttakisi ku siteegi ya Kyengera-Masaka katono ebifuba bibabugume ng’entabwe yavudde ku ssente ze batereka ez’okwekulaakulanya.

Baasoose kuyita lukiiko mu kifo ekimanyiddwa nga Rose Gardens e Kyengera kyokka bwe baabuuzizza abadde avunaanyizibwa ku kutereka ssente zino okubabuulira ze balinayo n’abategeeza nga bw’atazimanyi ekintu ekyabatabudde.
Baabadde bakyagenda mu maaso n’okuyomba ne Hajji Abdul Kiyimba n’ayingirawo n’abasaba okukyusa abakulembeze kuba ababaddeko si beesimbu era nabo kye baakoze.
Kiyimba yabagumizza nga bw’agenda okukola ekisoboka okulaba nga siteegi eno eggwaamu entalo. Juma Muteesasira, ssentebe wa siteegi eno yategeezezza nti ekizibu kye basinga okusanga mu mulimu gwa ttakasi be bantu abagwerimbikamu ate nga si batuufu.