Abalamazi abagenda e Mecca basabiddwa okukwata obudde

EKITONGOLE ekivunaanyizibwa ku by’entambula y’ennyonyi kiwabudde abalamazi abagenda e Mecca okutambula nga bukyali baleme kutaataaganyizibwa olw’akalippagano k’ebidduka ke balina mu kiseera kino.
Vianney Luggya omwogezi w’ekitongole kya Uganda Civil Aviation Authority yagambye nti omulamazi singa takeera kimala ayinza okutaataaganyizibwa kuba ekkubo ly’e Ntebe lyeyongedde okubaako akalippagano olw’abantu abawerekera abalamazi
abaatandise okusitula nga June 1, okutuuka June 7, 2024.
Ku Lwokutaano waasooseewo omukolo gw’okusiibula abalamazi bonna mu ggwanga ku muzikiti gw’e Wandegeya ogwakuliddwa jjajja w’Obusiraamu. Omulangira Khassim Nakibinge.
Nakibinge yakubirizza abalamazi bwe banaaba batuuse e Saudi Arabia okusabira Uganda
ebeere n’emirembe abantu bakomye okwenyigira mu bumenyi bw’amateeka n’abalala okweyambisa obubi obuyinza.
Sheikh Zakalia Kyewalyanga, ssentebe w’ekibiina ekigatta abatwala abalamazi ekya Uganda Bureau of Haj Affairs yagambye nti ku mulundi guno Gavumenti ya Uganda ng’eyambibwako eya Saudi Arabia baabayambye okufulumya viza z’abalamazi mu bwangu.